Кормандони Раёсати Хадамоти муҳоҷират дар шаҳри Душанбе вохӯрии судманд дар мавзӯи «Раванди муҳоҷирати меҳнатӣ ва навовариҳо дар қонунгузории муҳоҷиратии Федератсияи Россия” бо шаҳрвандони ҷумҳурӣ дар назди собиқ бозори Шоҳмансур баргузор намуд.

Ба ҳозирин оид ба навовариҳо дар самти қонунгузории муҳоҷиратии Федератсияи Россия суханронӣ намуда, қайд карданд, ки ҳамарӯза аз тарафи кормандони Раёсат ба ҳар як муроҷиаткунанда, ки азми сафари кишвари Россия дорад маслиҳатҳои ҳуқуқӣ дода, ба ҳар нафари онҳо буклетҳои гуногун оид ба қонунгузории Федератсияи Россия ва чӣ гуна рафтор намудан дар ин кишвар супорида, маслиҳатҳои муфид дода мешавад. Ба ғайр аз ин, ба иштирокчиёни ҷамъомад як ба як паҳлуҳои қонунӣ будани будубоши шаҳрвандони ҷумҳуриро дар Федератсияи Россия фаҳмонида дода шуд.

Ҳамзамон ба ҳозирин гуфта шуд, мушкилие, ки шаҳрвандони мо дар Россия дучор мегарданд, ин надонистани забони русӣ, риоя накардани қонунҳои ин кишвар, надоштани корти муҳоҷиратӣ ва ғайра мебошад. Таъкид карда шуд, ки пеш аз сафар ба хориҷи кишвар ҳар шаҳрванди мамлакат бояд ҳатман забони давлати воридшударо дар ҳаҷми муошират донад ва аз қонунҳои он бархурдор бошад.

Инчунин, дар мулоқот бо шаҳрвандон дар атрофи падидаҳои номатлуби экстремизм ва терроризм сухан гуфта қайд карда шуд, ки имрӯз ягон кишвар аз хатари терроризм эмин нест ва яке аз роҳҳои аз байн бурдани хатари ин падидаи манфур дастаҷамъона мубориза бурдани кишварҳои ҷаҳон ва бартараф намудани сабабҳои зуҳурёбии он мебошад. Он ба хатари бесобиқаи ҷаҳонӣ табдил ёфта, оқибатҳои фоҷиабору харобиовари ҷамъиятиву сиёсӣ ва маънавиро ба бор овардааст.

Тибқи маълумот дар зарфи солҳои охир зиёда аз сад мамлакати дунё ҳадафи амалҳои харобкоронаи террористон қарор гирифта, бар асари ҳамлаҳои террористӣ садҳо ҳазор нафар аҳолии осоишта ба ҳалокат расида, миллионҳо нафар макону манзили зисташонро тарк кардаанд.

Дар давраи ҳозира мутаассифона дар арсаи байналхалқӣ фаъолияти ифротгароёнаи террористӣ ва экстремистӣ аз тарафи қувваҳои гуногун хеле фаъол гардидааст.

Афзоиши ҷиноятҳои хусусияти экстремистӣ ва террористӣ дошта ба вусъат ёфтани терроризми байналмилалӣ, фаъолшавии унсурҳои тундраву ифротгаро, ҷалби ҷавонон ба сафи созмонҳои экстремистиву террористӣ ва иштироки онҳо дар низоъҳои мусаллаҳонаи давлатҳои хориҷӣ мусоидат менамояд.

Мубориза бар зидди терроризму экстремизм ва дигар таҳдидҳои замони муосир яке аз самтҳои муҳими фаъолияти Ҳукумати Ҷумҳурии Тоҷикистон ва сиёсати дохиливу хориҷии он мебошад.

Дар фарҷом ба иштирокчиён буклетҳо, аз қабили “Пеш аз сафар бидон”, “Роҳнамо оид ба касбомӯзии муҳоҷирони меҳнатӣ”, “Маслиҳатҳои муфид барои муҳоҷирони меҳнатӣ”, “Навоварӣ дар қонунгузории муҳоҷиратии ФР”, “Как получить разрешение на работу”, Мо бар зидди терроризм ва экстремизм (ифротгароӣ) тақдим карда шуд.

Раёсати Хадамоти муҳоҷират дар шаҳри Душанбе