Бо ибтикори бахши Хадамоти муҳоҷират дар ноҳияи Рӯдакӣ вохӯрии судманд бо бонувони ҳунарманд ва оилаи муҳоҷирони меҳнатӣ баргузор гардид.
Тавре аз бахши Хадамоти муҳоҷират хабар доданд, мақсад аз баргузории ин чорабинӣ, пеш аз ҳама ҷалби оилаи муҳоҷирони меҳнатӣ ба касбҳои ҳунармандӣ мебошад.
Айни замон баҳри фарогирии занону бонувон бо ҷои кор ва касбомӯзӣ дар ноҳия марказҳои таълими – касбомӯзӣ амал мекунад, ки дар он занону духтарон барои омӯзиши касбҳои дӯстдоштаашон машғуланд.
Аз ҷумла, касбҳои дӯзандагӣ, атласу адрасбофӣ, хӯрокпазӣ ва ғайра машғул мебошанд. Бояд гуфт, ки марказҳои таълими – касбомӯзӣ бо таҷҳизотҳои ҳозиразамон муҷаҳҳаз гардидаанд.
Баъди хатми курсҳои кутоҳмуддат занону духтарони хонанишин соҳиби шаҳодатномаи ҳунармандӣ ва касбу ҳунар мегарданд.
Дар фарҷоми чорабинӣ ба 18 нафар занону духтарони хонашин тавсия барои касбомӯзи дода шуд.
Бояд гуфт, ки бо мақсади ба касбомӯзӣ ҷалб намудани шахсоне, ки ҳунар надоранд бо Қарори Ҳукумати Ҷумҳурии Тоҷикистон аз 31 декабри соли 2020, №703 «Барномаи касбомӯзии шаҳрвандони Ҷумҳурии Тоҷикистон барои солҳои 2021-2025» қабул гардид, ки тибқи он дар панҷ соли оянда ба касбомӯзӣ ҷалб намудани 1 миллион нафар пешбинӣ шудааст.
Ёдовар мешавем, ки дар мамлакат 15 сол аст Маркази таълими калонсолони Тоҷикистон фаъолият дорад, ки барои таъмини бозори меҳнат бо кадрҳои баландихтисоси коргарӣ саҳми босазо мегузорад.
Дар ин муддат дар Маркази мазкур қариб 500 ҳазор шаҳрванд дар курсҳои кӯтоҳмуддат соҳибкасб гардидаанд. Маркази таълими калонсолони Тоҷикистон айни замон бо фарогирӣ аз 34 филиал, шаҳрвандонро аз рӯи 110 касбу ихтисос омода намуда, ба бозори меҳнат пешниҳод менамояд.
Бахши Хадамоти муҳоҷират дар ноҳияи Рӯдакӣ
