Бо ибтикори шуъбаи Хадамоти муҳоҷират дар шаҳри Хуҷанд чорабинии судманд бо сокинони маҳаллаи “Навбаҳор”-и шаҳри Хуҷанд баргузор гардид.
Мавзуи асосии чорабинӣ ин омодагӣ пеш аз сафар ба хориҷа, имкониятҳои касбомузӣ дар муассисаҳои таълимии Вазорати меҳнат, муҳоҷират ва шуғли аҳолии Ҷумҳурии Тоҷикистон, эҳтиёт будан аз ширкатҳои қалбакӣ, афзалиятҳои ҷалби муташаккилона сафарбар намудани муҳоҷирони меҳнатӣ, тарзи бастани шартномаи корӣ, пешгирии шомилшавии шаҳрвандон аз ҳизбу ҳаракатҳои ифротӣ, пешгирӣ аз муҳоҷирати ғайриқонунӣ, навгониҳо дар қонунгузории Федератсияи Россия дар самти муҳоҷират ва як қатор дигар масъалаҳои мубрам вобаста ба муҳоҷирати меҳнатӣ, буд.
Дар суҳбат бо сокинони маҳалла намояндаи шуъбаи Хадамоти муҳоҷират, доир ба тағйироту иловаҳо ба қонунгузории Федератсияи Россия дар самти муҳоҷирати меҳнатӣ, ҷиҳати будубоши шаҳрвандони Ҷумҳурии Тоҷикистон дар давлати номбурд, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, таъриху тамаддун ва асосҳои қонунгузории ин кишвар, тарзи супоридани имтиҳонҳо, доштани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан, ёрии тиббӣ расонидан ба шаҳрвандони хориҷӣ дар қаламрави Федератсияи Россия, гирифтани патент, тартиб додани шартномаи меҳнатӣ, шомил нашудан ба ҳизбу ҳаракатҳои ифротгароӣ, экстремизму терроризм ва муқовимат ба савдои одамон, расонидани кумак ба қурбониёни савдои одамон, фаҳмонидани талаботҳои қонуни Ҷумҳурии Тоҷикистон “Дар бораи ҷашну маросим дар Ҷумҳурии Тоҷикиситон” гуфтугузор намуд.
Инчунин, иброз намуд, ки барои сабти ном дар замимаи мобилии “Госуслуги RuID ва кушодани ҳуҷраи (кабинет) шахсӣ, ба шумо лозим аст, ки якчанд қадамро иҷро намоед. Аввал замимаро бо номи “Госуслуги” бо телефони худ боргирӣ намуда, онро гузоред. Сипас замимаро кушоед, тарзи сабти номро интихоб намоед, маълумоти шахсии худро ворид кунед (ном, насаб, рақами телефон ва почтаи электронӣ), сабти номро тавассути SMS ё email тасдиқ намоед ва як рамзи махфии боэътимод ихтироъ кунед.
Бо ҳамин чорабинӣ ба охир расида қайд гардид, ки рӯзҳои наздик дар дигар маҳаллаҳои шаҳр низ чунин вохӯриҳо баргузор хоҳад гардид.
Раёсати Хадамоти муҳоҷират дар вилояти Суғд
