Бо ташаббуси МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе вохӯрии судманд бо сокинони ноҳияҳои пойтахт ва шаҳрвандони ҷумҳурӣ, баргузор гардид.
Дар чорабинӣ директори Марказ Акбаров Хуҷаназар доир ба баланд бардоштани маърифати ҳуқуқии сокинони пойтахт, пешгирӣ аз шомилшавии ҷавонон ба ҳизбу ҳаракатҳои ифротӣ, ҳифзи арзишҳои миллию фарҳангӣ, зуроварӣ дар оила, савдои одамон ва тарбияи наврасон дар руҳияи меҳанпарастӣ ва дигар масъалаҳои мубрами рӯз суханронӣ намуд.
Аз ҷумла, қайд намуд, ки таҳти сиёсати хирадмандона ва бунёдкоронаи Пешвои миллат муҳтарам Эмомалӣ Раҳмон Ҷумҳурии Тоҷикистон торафт зебову шукуфон гашта ба сокинонаш шароити хуби кору фаъолият ва зиндагии осоишта фароҳам оварда шуд.
Зикр шуд, ки сокинони пойтахт, аз ҷумла ҷавононро месазад дар партави сиёсати Сарвари давлат муҳтарам Эмомалӣ Раҳмон иқдомоти созандаро пеша намуда, ба ҳар гуна фиребу найранг ва ҳизбу ҳаракатҳои ифротгарои рӯй наоваранд.
Ҳушёрии сиёсиро аз даст надиҳанд ва барои ватану сарзаминамон хизмат намоянд.
Ҳамзамон иброз гардид, ки имрӯзҳо дар дунё ба миқдори зиёд гурӯҳҳои ғайриқонунии террористӣ ташкил гардидааст, ки онҳо фаъолияти хешро паҳн намуда истодаанд ва мақсади асосии онҳо ин ноором намудани вазъ бо истифода аз ғояҳои экстремистӣ ва ҷалби бештари пайравон дар сартосари ҷаҳон мебошад.
Аз ин рӯ, мо бояд ҳушёриву зиракии сиёсиро аз даст надода, фирефтаи гумроҳи чунин ниятҳои нопоки ҳизбу ҳаракатҳои тундрав нагардида, ҷавононро ҳушдор созем, то ба онҳо шомил нагарданд.
Дар суханронии худ директори Марказ, ба ҷамъомадагон гуфт, ки муассисаи онҳо омодааст, як гурӯҳ шаҳрвандони мамлакатро, ки соҳибкасб мебошанд, бо ҷойи кор берун аз ҷумҳурӣ, аз ҷумла дар ширкатҳои Федератсияи Россия ва дигар давлатҳо таъмин намояд.
Шахсоне, ки ба ин Марказ муроҷиат мекунанд, ҳамаи ҳуҷҷатгузориҳо ройгон сурат мегирад.
Ҳамзамон ба ҳозирин рӯйхати ҷойҳои холии корӣ дар ширкатҳои сохтмонии НБО “Роғун” бо номгӯи пурраи ихтисосҳо, шароити корӣ, меъёри музди меҳнат, талаботи корфармо пешниҳод карда шуд.
Дар хотимаи суҳбат ба ҳар як шаҳрванди ҷумҳурӣ буклетҳо бо мазмуни: “Мо бар зидди терроризм ва экстремизм (ифротгароӣ)” бо забони тоҷикӣ супорида шуд.
Бояд тазаккур дод, ки меҳвари сиёсати ҳуқуқии Ҷумҳурии Тоҷикистонро арзиши олӣ будани ҳуқуқу озодиҳои инсон ва ҳифзи онҳо, гуногунандешии сиёсӣ, баробарии шаклҳои гуногуни моликият ташкил дода, он ба коҳиш додани таъсири манфии ҷаҳонишавӣ, муқовимат ба хатарҳо ва таҳдидҳои ҷаҳонӣ (терроризм, экстремизм, ришваситонӣ ва дигар зуҳуроти хатарзо) ва ҳифзи фазои иттилоотии мамлакат аз хатарҳои иттилоотии ҷаҳони муосир равона карда мешавад.
Аз ин рӯ, Соли маърифати ҳуқуқӣ эълон шудани соли 2024 бояд марҳилаи нави рушди ҷомеа дониста шавад.
Чунин вохӯриҳои судманд бо сокинони пойтахт ва шаҳрвандони ҷумҳурӣ мунтазам баргузор хоҳад шуд.
МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе
