Шуъбаи Хадамоти муҳоҷират дар ВМКБ дар якҷоягӣ бо МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Хоруғ ва “Агентии бокортаъминкунӣ дар хориҷи кишвар” вохӯрии судманд дар деҳаҳои дурдасти Ҷамоати деҳоти Язғуломи ноҳияи Ванҷ баргузор намуданд.
Дар рафти вохӯриҳо ба ҷамъомадагон фаҳмонида дода шуд, ки Ҷумҳурии Тоҷикистон яке аз давлатҳои интиқолдиҳандаи қувваи корӣ ба хориҷи кишвар, хусусан Федератсияи Россия ҳисоб ёфта, ҳамасола теъдоди муайяни шаҳрвандон ба муҳоҷирати меҳнатӣ сафар мекунанд, сокинони вилоят низ аз ин истисно нестанд.
Мақсади асосии баргузории вохӯриҳо дар он аст, ки ба сокинон бояд фаҳмонида шавад, ки вазъи ҷаҳони муосир бисёр мураккаб шуда истодааст ва ҳар як давлати қабулкунандаи муҳоҷирони меҳнатӣ сараввал бехатарии давлати худро дар мадди аввал гузошта, нисбати муҳоҷирони меҳнатӣ талаботҳои махсусро доранд.
Қайд карда шуд, ки шаҳрвандони Ҷумҳурии Тоҷикистон, ки ба муҳоҷирати меҳнатӣ сафар мекунанд бояд талаботи давлатҳои муҳоҷирпазирро пеш аз сафар омӯзанд ва дар амал риоя намоянд. Ҳар як сокини вилоят, ки хоҳиши сафар ба муҳоҷирати меҳнатиро дорад, пеш аз ҳама бояд забони давлатӣ, қонунҳои амалкунандаи Федератсияи Россия, таърих ва фарҳанги ин давлатро омӯзад.
Баромадкунандагон роҳҳои пешгирии таассубу хурофот, шомилшавии ҷавонон ба ҳизбу ҳаракатҳои экстремистиву террористӣ, мубориза бар зидди ҷинояткорӣ, инчунин, таълиму тарбияи насли наврас, оқибатҳои нохуши шомилшавии ҷавонон ба ҳаракатҳои иртиҷоӣ ва дигар паҳлуҳои мусбӣ ва манфии муҳоҷирати меҳнатиро мавриди баррасӣ қарор дода, ҳангоми дучор гардидан ба ҳар гуна ҳолатҳои шубҳаовар, ба мақомотҳои дахлдори Федератсияи Россия ё Сафорати Ҷумҳурии Тоҷикистон, Консулгариҳои он дар кишвари Федератсияи Россия ё Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ин кишвар муроҷиат намоянд.
Ба муҳоҷирони меҳнатие, ки аз давлати Федератсияи Россия ба Ватан баргаштаанд, барои дарёфти кори мувофиқ дар дохили кишвар бо музди меҳнати арзанда ва шароиту имконияти хуб дар ширкатҳои сохтмонӣ, саноатӣ, роҳсозӣ ва дигар корхонаҳои бузурги ватанӣ, аз қабили ҶСК “НБО Роғун”, НБО «Себзор» дар ноҳияи Роштқалъа, сохтмони роҳи байналмилалии Дарвоз – Ванҷ, даромадгоҳи ноҳияи Рушон ва дигар сохтмонҳои хурду бузург чи дар қаламрави вилоят ва чи дар қаламрави ҷумҳурӣ тавсияҳо дода шуд.
Шуъбаи Хадамоти муҳоҷират дар ВМКБ
