Бо ибтикори бахши Хадамоти муҳоҷират дар ноҳияи Спитамен якҷоя бо Мақомоти иҷроияи ҳокимияти давлатии ноҳия ва КИ ХҲДТ дар деҳаи Истиқлол вобаста ба соли 2024 эълон гардидани “Соли маърифати хуқуқӣ” вохӯрии судманд бо сокинон баргузор гардид.

Дар чорабинии мазкур баромадкунандагон оид ба пешгирии шомилшавии ҷавонон ба ҳизбу ҳаракатҳои ифротӣ, тарзи дуруст истифода намудани телефонҳои мобилӣ, хусусан шабакаҳои иҷтимоӣ, омодагии пеш аз сафар, муҳоҷирати бехатар, пешгирии ҳуруфотпарастӣ, тарғиби либосҳои миллӣ, ҷалби шаҳрвандон ба касбомӯзи, доир ба фаъолияти меҳнатӣ дар муҳоҷират ва тартиби будубоши шаҳрвандон, ки ба қаламрави давлати хориҷа хусусан ба Федератсияи Россия ворид мегарданд, оид ба тағйиротҳои нав дар қонунгузории кишвари Россия, инчунин шиносоӣ бо қонунҳои амалкунанда, сӯҳбат гузаронида шуд.

Мудири бахши Хадамоти муҳоҷират Урунбоев Баҳром қайд намуд, ки дар шароити ҷаҳонишавию душвор гардидани муносибатҳои байналмилалии сиёсию иқтисодӣ, мураккаб гардидани авзои сиёсии минтақа, пос доштани арзишҳои миллию маънавӣ, баланд бардоштани сатҳи фарҳангӣ — сиёсӣ ва маърифати ҳуқуқии аҳолии ҷумҳурӣ, хусусан ҷавонон диққати махсус зоҳир намудан амри зарурӣ мебошад.

Яке аз падидаҳои асосие, ки имрӯз сабаби шомилшавии ҷавонон ба ҳизбу ҳаракатҳои террористиву экстремистӣ мегардад, ин шабакаҳои интернетии гурӯҳҳои ифротгароӣ ва таълимоти ғайриқонунии динӣ мебошад.

Ташкилоти террористиву экстремистӣ бо суйистифода аз эҳсоси динии ҷавонони ноогоҳ дар ҷараёни таълимоти худ онҳоро нисбат ба гузаштагони худ дар руҳияи бадбинӣ ба арзишҳо, суннатҳо ва урфу одати миллии мо тарбият намуда, ин арзишҳоро барои як мусалмон нолозим ва ғайри қобили қабул муаррифӣ менамоянд.

Ҳамзамон ба сокинони деҳа барои муҳоҷирати бехатар ба давлатҳои хориҷа, якчанд дастурҳои муфид оид барасмиятдарории хуҷҷатҳо ва тартиби будубош дар хориҷа дода шуд.

Бахши Хадамоти муҳоҷират дар ноҳияи Спитамен