19 сентябри соли равон муовини роҳбари барномаҳои рушди Британияи Кабир дар Осиёи Миёна, Майкл Галлагер ва ҳамроҳони ӯ ба Хадамоти муҳоҷират ташриф овард.
Ҷонибҳо оид ба масъалаҳои ба танзим даровардани раванди муҳоҷират, қоидаҳои будубош, ҳимояи ҳуқуқии муҳоҷирони меҳнатӣ, пешгирии муҳоҷирати ғайриқонунӣ ва дигар масъалаҳои мубрами рӯз, суханронӣ намуданд.
Дар рафти вохӯрӣ ҷонибҳо дар бораи чорчӯбаи лоиҳаи “Муҳоҷирати бехатари коргарони мавсимӣ аз Осиёи Марказӣ ба Британияи Кабир”, ки аз 1-уми апрели соли ҷорӣ оғоз шудааст, баҳри беҳтар омода намудани муҳоҷирони меҳнатӣ барои иштирок дар барнома равона шудааст, ибрози сухан намуданд.
Дар суҳбат Сардори Хадамоти муҳоҷират Нодирзода Иматшо, қайд намуд, ки тибқи идомаи интихоб ва сафарбаркунии шаҳрвандон барои корҳои мавсимии кишоварзӣ ба Британияи Кабир дар доираи ҳамкорӣ бо ширкатҳои кишвари мазкур, ки хостори фаъолияти муваққатии меҳнатӣ дар соҳаи кишоварзии Британияи Кабир доранд, маълумот дод.
Ҳамзамон ӯ иброз намуд, ки айни замон дар назди МД “Марказҳои машваратӣ ва омодагии пеш аз сафари муҳоҷирони меҳнатӣ” омӯзиши забони англисӣ ройгон ба роҳ монда шудааст.
Инчунин, изҳор дошт, ки минбаъд шаҳрвандоне, ки забони давлати муҳоҷирпазирро аз худ менамоянд, бояд дар навбати аввал ба хориҷа фиристода шаванд.
Дар навбати худ ҷаноби Майкл Галлагер муфассал дар бораи барномаҳои рушди Британияи Кабир дар Осиёи Миёна, аз ҷумла дар Ҷумҳурии Тоҷикистон маълумот пешниҳод намуда, дар рафти мулоқот ба саволҳои Сардори Хадамот ҷавобҳои қонеъкунанда дод.
Ҳамзамон ҷаноби Майкл Галлагер изҳори миннатдорӣ намуда, арз намуд, ки омодааст барои боз ҳам хубтару беҳтар ба роҳ мондани ҳамкорӣ бо Хадамоти муҳоҷирати Вазорати меҳнат, муҳоҷират ва шуғли аҳолӣ Ҷумҳурии Тоҷикистон дар ҷалби шаҳрвандони Тоҷикистон барои корҳои мавсимӣ ба кишвари Британияи Кабир, мусоидат хоҳад кард.
Дар фарҷом, ҷаноби Майкл Галлагер аз фаъолияти МД “Марказҳои машваратӣ ва омодагии пеш аз сафари муҳоҷирони меҳнатӣ”- и Хадамоти муҳоҷират дар шаҳри Душанбе дидан намуда, бо чанд нафар шаҳрвандони ҷумҳурӣ, ки дар синфхонаи Марказ бо омӯзиши забони англисӣ қарор доштанд, ҳамсуҳбат гардид.
Маркази матбуоти Хадамоти муҳоҷират
