Бо ибтикори шуъбаи Хадамоти муҳоҷират дар шаҳри Хуҷанд бо занҳои фаъоли маҳаллаи “Сирдарё”-и шаҳри Хуҷанд вохӯрии судманд баргузор гардид. Дар вохӯри мазкур доир ба Қонуну қоидаҳои нави Федератсияи Россия № 1126 аз 30.12.2024 шаҳрвандони хориҷие, ки маълумот дар бораи онҳо ба феҳристи шахсони назоратшаванда ворид карда мешавад, бояд ихтиёран аз қаламрави Федератсияи Россия бароянд ё аз 1 январ то 30 апрели соли 2025 бояд ҳолати ҳуқуқии худро ба танзим дароранд (бе баромадан аз ҳудуди Россия ва бе назардошти мақсади воридшавӣ).
Ба танзимдарории ҳолати ҳуқуқии шаҳрванди хориҷӣ дар он ҳолат анҷом меёбад, агар шаҳрванд:
1.идентификатсияи маълумоти биометрии шахсиро гузашта бошад;
2.ҳуҷҷати тасдиқкунандаро оид ба донистаи забони русӣ, таърихи Россия ва асосҳои қонунгузории Федератсияи Россия пешниҳод намуда бошад;
3.нисбати чунин шаҳрванд асос барои надодани патент ё беэътиборнок донистани он, Иҷозатномаи зисти муваққатӣ (РВП) ва ё Иҷозати иқомат (ВНҶ) вуҷуд надошта бошад.
Қайд карда шуд, ки барои дастрас намудани маълумоти мухтасар доир ба ин масъала, ҳатман бояд ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷиқистон дар Федератсияи Россия бо рақами телефони 7 (495) 967 98 44 занг занед ё ба 7 (999) 912 58 68 – Whatsapp нависед.Инчунин, гуфта шуд, ки шурӯъ аз 1 январи 2025 Қоидаи 90/365 амали худро оғоз намудааст Дар асоси ин Қоида 90/180 қатъ карда шуд ва муҳлати 180 шабонарӯз ба 365, яъне соли тақвимӣ иваз карда шудааст.
Мутобиқи ин Қоида ҳар як шаҳрванди хориҷие, ки пас аз 1 январи соли 2025 ба Федератсияи Россия бе раводид ворид мешавад ва Патент ё Иҷозат барои истиқомати муввақатӣ (РВП) ё иҷозати доимӣ (ВНҶ ) ба даст намеорад, метавонад аз рӯзи воридшавӣ ба Федератсияи Россия дар муддати соли тақвимӣ танҳо 90 шабонарӯз будубош намояд. Пеш аз ба итмом расидани 90 шабонарӯз шаҳрванди хориҷӣ ҳатман бояд убури сарҳад намояд ва то ба охир расидани соли тақвимӣ, яъне 31 декабр ҳуқуқи дубора ба Федератсияи Россия ворид шуданро надорад.
Дар суҳбат сардори шуъбаи Хадамот ҷиҳати будубоши шаҳрвандони Ҷумҳурии Тоҷикистон дар давлати номбурда, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оиди донистани забони русӣ, таъриху тамаддун ва асосҳои қонунгузории ин кишвар (тарзи супоридани имтиҳонҳо), донистани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан дар қаламрави Федератсияи Россия, гирифтани Патент, тартиб додани шартномаи меҳнатӣ, танҳо бо шиносномаи хориҷӣ ворид шудан, шомил нашудан ба ҳизбу ҳаракатҳои ифротгароӣ, муқовимат ба савдои одамон ва расонидани кумак ба қурбониёни савдои одамон, суханронӣ намуд.
Раёсати Хадамоти муҳоҷират дар вилояти Суғд
