Дар доираи чорабиниҳои бахши Хадамоти муҳоҷират дар ноҳияи Рӯдакӣ дар Ҷамоати деҳоти Зайнабобод маҳаллаҳои Садоқат ва Тоҷикобод бо фаъолон, ҷавонон, собиқадорон ва ходимони дин бахшида ба “Соли маърифати ҳуқуқӣ” вохӯрии судманд баргузор гардид.

Дар аввал намояндаи раёсати Агентии шуғли аҳолӣ дар ноҳия Шаҳноза Шарапова баромад намуда, масъалаҳои баланд бардоштани маърифати оиладорӣ, пешгирии пошхӯрии оилаҳои ҷавон, зӯроварӣ дар оила, роҳ надодан ба фарҳанги бегона ва пешгирӣ намудани ҳолатҳои номатлуб дар байни аҳолӣ, махсусан, қишри ҷавон, инчунин бо ҷойи кори доимӣ ва мавсимӣ таъмин намудани занони хонашин, аз ҷумла муҳоҷирзанони ба ватан баргаштаро мавриди баррасӣ қарор дод.

Ҳамзамон мудири бахши Хадамоти муҳоҷират дар ноҳия Идиев Азизулло, оид ба вазъи ноустувори сиёсии ҷаҳон, афзун гардидани хатару таҳдид ба амнияти саросари, роҳ надодан ба зиёдаравию хурофот, амалишавии қонунҳои миллӣ, пешгирии гаравиши баъзе ҷавонон ба ҳизбу ҳаракатҳои ифротию террористӣ, шуғли пурмаҳсул, тарбияи ахлоқии насли наврас ва ҷавон, таҳкими пояҳои Истиқлолияти давлатӣ ва ваҳдати миллӣ, иштироки фаъолона дар корҳои ҷамъиятӣ, кишту кор, истифодаи заминҳои наздиҳавлигӣ, баргузории маъракаҳои хурсандӣ ва азодорӣ дар доираи меъёрҳои қонун, пешгирии ҷудошавии оилаҳои ҷавон, вусъати корҳои созандагию бунёдкорӣ ба муносибати 35-солагии Истиқлоли давлатии Ҷумҳурии Тоҷикистон, тарбияи ҳарбӣ – ватандӯстии ҷавонон, омода намудани онҳо барои хизмат дар сафи Қувваҳои Мусаллаҳи Ҷумҳурии Тоҷикистон ва дигар масъалаҳои муҳимро таъкид намуданд.

Дар хотимаи ҳамоиш баромадкунандагон ба ҳозирон оид ба тағйиротҳо дар Қонуни Ҷумҳурии Тоҷикистон “Дар бораи масъулият барои таълиму тарбияи кӯдак” ва Қонуни Ҷумҳурии Тоҷикистон “Дар бораи танзими ҷашну маросимҳо” фикру андешаҳои худро баён намуданд.

Бахши Хадамоти муҳоҷират дар ноҳияи Рӯдакӣ