Бо ибтикори  Шуъбаи Хадамоти муҳоҷирати шаҳри Хуҷанд вохӯрии судманд бо фаъолон, сардорони хонаҳои маҳаллаи “Ҷаббор Расулов” баргузор гардид.

Сардори шуъбаи Хадамоти муҳоҷират дар шаҳри Хуҷанд Саторова М., дар баромадаш оид ба тағйироту иловаҳо ба қонунгузории Федератсияи Россия дар самти муҳоҷирати меҳнатӣ, ҷиҳати будубоши шаҳрвандони Ҷумҳурии Тоҷикистон дар давлати номбурда, омодагӣ пеш аз сафар, бақайдгирӣ, ҳуҷатгузорӣ дар Федератсияи Россия, пешниҳоди сертификат оид ба донистани забони русӣ, таъриху тамаддун ва асосҳои қонунгузории ин кишвар (тарзи супоридани имтиҳонҳо), донистани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан, ёрии тиббӣ расонидан ба шаҳрвандони хориҷӣ дар қаламрави Федератсияи Россия, гирфтани патент, бастани шартномаи меҳнатӣ бо кордиҳанда, танҳо бо шиносномаи хориҷӣ ворид шудан дар алоҳидагӣ иброз намуд. 

    Инчунин, ӯ чанд сухан оиди роҳҳои пешгирии шомилшавии муҳоҷирони меҳнатӣ ба ҳизбу ҳаракатҳои ифротгаро гуфта гузашта таъкид дошт, ки дар ин самт, пеш аз ҳама, бояд падару модарон ва шахсони наздики онҳо масъулият ҳис намоянду корбарӣ кунанд.

    Сардорони хонаҳоро ва дар симои онҳо аҳли ҷомеаро ба муборизаи дастҷамъона бар зидди хатарҳои замони муосир даъват кард.

Раиси занони маҳаллаи “Ҷаббор Расулов” дар баромади худ оиди ҷавонон, ки қишри ояндасозу қувваи пешбарандаи давлату миллат ба ҳисоб мераванд, ҷиҳати ба илму дониш фаро гирифтани онҳо аз ҷониби роҳбарияти давлату ҳукумат чораҳои муассир андешида мешавад.

Тавре Пешвои миллат Эмомалӣ Раҳмон пайваста таъкид менамоянд: “Ҷавонон қувваи бузург, нерӯи созанда ва ояндаи миллатанд”.

Дар ҳақиқат, тибқи босамари сиёсати давлатии ҷавонон аз рӯзҳои  нахустин соҳибистиқлолӣ дар меҳвари фаъолияти Ҳукумати Ҷумҳурии  Тоҷикистон қарор доранд.  

Аксарияти аҳолии Тоҷикистонро ҷавонон ташкил медиҳанд, ки онҳо давомдиҳандаи кору фаъолияти насли калонсолон, нерӯи созанда ва иқтидори воқеии пешрафти ҷомеа, хулоса ояндаи миллат ва давлат мебошанд.

Раёсати Хадамоти муҳоҷират дар вилояти Суғд