Бахши Хадамоти муҳоҷират дар шаҳри Конибодом дар ҳамкорӣ бо Мақомоти иҷроияи ҳокимияти давлатии шаҳр дар толори муассисаи таҳсилоти умумии №46 вохӯрии судманд бо муҳоҷирони ба ватан баргашта ва аъзои оилаи онҳо баргузор намуд.
Дар рафти вохӯрӣ баромадкунандагон дар атрофи огоҳсозӣ аз падидаҳои номатлуб, терроризму экстремизм, коррупсия, масъулияти падару модар дар таълиму тарбияи кӯдак, интихоби касб, ҳифзи манфиатҳои миллӣ, дар бораи тарбияи ватандӯстии шаҳрвандон, қонунгузории нави Федератсияи Россия дар самти муҳоҷират, пешгирии бемории сироятии ВНМО, либоспӯшии фарҳанги миллии бегона, муқовимат бо савдои одамон, одамрабоӣ ва дигар масъалаҳои мубрами рӯз баромад намуданд.
Мудири бахши Хадамоти муҳоҷират дар шаҳри Конибодом Толибова Фарзона оид ба кортаъминкунӣ дар хориҷи кишвар, тағйироту илова ба қонунгузории Федератсияи Россия дар самти муҳоҷирати меҳнатӣ, омодагии пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оид ба донистани забони русӣ, таъриху тамаддун ва асосҳои қонунгузории Федератсияи Россия, тарзи супоридани имтиҳонҳо, гирифтани Патент, ба касбомӯзи ва ҳунаромӯзӣ ҷалб намудани занҳои хонашин, баромад намуда, варақаи иттилоотӣ оид ба касбомӯзӣ, забономӯзӣ ва гирифтани қарзҳои имтиёзнок тақсим намуд.
Сармутахассиси шуъбаи кор бо занон ва оилаи назди Мақомоти иҷроияи ҳокимияти давлатии шаҳр Исмоилова Наргис, оид ба ҷудошавии оилаҳои ҷавон, оилаву оиладорӣ ва иштироки фаъолона дар ободонии маҳалла, кам намудани сатҳи камбизоатии аҳолӣ, суханронӣ намуд.
Имомхатиби деҳа Фахриддин Маҳмудов вобаста ба пешгирии таълимоти ғайриқонунии динӣ ва шомилшавии ҷавонону наврасон ба ҳизбу ҳаракатҳои иртиҷоӣ дар назди иштирокдорон баромад намуда, қайд кард ки асоси ҳамаи ин масъалаҳои муҳими ҷомеаро, пеш аз ҳама тарбияи оила ва ҳидояти дурусти падару модар, тарбияи омӯзгор ташкил медиҳад.
Баромадкунандагон вобаста ба самтҳои фаъолияташон, аз ҷумла омилу сабабҳои ҷудошавии оилаҳои ҷавон, пешгирии ҷинояткории занон, тағйироту илова ба қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон» таҳлилу андешаҳои судманд намуданд.
Раёсати Хадамоти муҳоҷират дар вилояти Суғд
