Бо ибтикори шуъбаи Хадамоти муҳоҷират дар ВМКБ вохӯриву мулоқотҳои навбатӣ бо сокинони ҷамоатҳои деҳоти ноҳияи Рушон, аз ҷумла муҳоҷирони ба Ватан баргашта ва аъзои оилаи онҳо баргузор гардид.

Дар вохӯрӣ мудири шуъбаи Хадамоти муҳоҷират двр ВМКБ Мулкамон Каниев муфассал дар бораи муҳоҷирати меҳнатӣ, қонунгузории нави Федератсияи Россия дар самти муҳоҷират, тарзи гирифтани Патент, қайди муваққатӣ, доштани Сертификат бо донистани забони русӣ, таърих ва қонунгузории ин кишвар, риоя намудани қоидаҳои будубош дар ин давлат ва дигар масъалаҳои мубрами рӯз ибрози ақида намуд.

Аз ҷумла, ӯ қайд кард, ки бисёри аз шаҳрвандони мо бе омодагии пешакӣ ба муҳоҷират сафар менамоянд ва сари вақт будубоши худро қонунӣ намегардонанд, ба мушкилиҳои зиёд дучор мешаванд.

Ин ҳолатҳоро “моҳирона” истифода бурда ашхоси миёнарав муҳоҷирони меҳнатиро бо музди ночиз ба кори ғайриконунӣ даъват менамоянд.

Аз ин лиҳоз, ба мо зарур аст, ки шаҳрвандоне, ки хоҳиши сафар ба муҳоҷирати меҳнатӣ доранд, омодагии хуб дида баъд ба сафар бароянд.
Дигар масъалае, ки моро дар ташвиш меорад ин шомилшавии ҷавонон ба ҳизбу ҳаракатҳои ифротӣ мебошад. М. Каниев ба ҳозирин рӯ оварда қайд кард, ки дар ҷомеаи муосир баъзан муаммоҳои мавҷудаи шомилшавии ҷавонон ба гурӯҳҳои экстремистиву террористӣ, ки садди роҳи ҷавонон гардида истодааст, чанде аз масоили роҳҳои пешгирии онро аз ин зуҳуроти номатлуби ҷомеа мувофиқи мақсад шуморид.

Дар ин замина, метавон омӯзиши таърихи солҳои сохибистиқлолиро ба роҳ монд, ки то ҷавонон аз ибтидои ҷанги шаҳрвандӣ, муборизаҳои шадиди давлату Ҳукумат дар пойдории сулҳу ваҳдати миллӣ ва омилҳои пайдоиши терроризму экстремизм дар Тоҷикистон сабақ гирифта, дар решакан намудани он тасмим хоҳанд гирифт.

Барои ҷавонони мо ҳамчун яроқу аслиҳа танҳо дониш, маърифат ва тафаккури интиқодӣ кӯмак расонида метавонад ва ба муқобили ҳамагуна падидаҳои манфии ҷомеа баромад карда метавонад.
Агар ҷаҳонбинӣ васеъ ва маърифати насли ҷавон кофӣ бошад раҳоӣ аз ин дарди ҷомеа осон мегардад.

Аз ҷониби дигар, таҳлили хабару гузориш ва маводҳои дар сомонаву шабакаҳои иҷтимоии мамнуъ гузошташуда моро боз ҳам ҳушёр намуда, аз хабарҳои дурӯғину сохта ошно месозад. Вазифаи мо таҳлили воқеӣ ва муқовимат нишон додан бо гурӯҳҳои экстремистиву террористӣ бояд маҳсуб ёбад.

Бояд тазаккур дод, ки вохӯриву мулоқотҳои навбатӣ дар ҷамоатҳои деҳоти ба номи М. Абдулвосиев, Н. Додхудоев, Рушон, Бартанг, Басид ва Савҷоб баргузор гардиданд.

Шуъбаи Хадамоти муҳоҷират дар ВМКБ