Вохӯриву суҳбатҳо бо муҳоҷирони меҳнатӣ дар фурудгоҳҳо, истгоҳи роҳи оҳан, нақлиёти мусофирбар дар мавзӯи омодагӣ пеш аз сафар, пешгирии ҳодисаҳои пайвастани ҷавонон ба ҳизбу ҳаракатҳои террористию экстремистӣ, одамрабоӣ ва донистани қонунҳои нави Федератсияи Россия дар самти муҳоҷират, идома дорад.
Бояд тазаккур дод, ки вобаста ба вазъи омаду рафти муҳоҷирони меҳнатӣ – шаҳрвандони ҷумҳурӣ ба Федератсияи Россия дар Фурудгоҳи байналмилалӣ шаҳри Душанбе корҳои фаҳмондадиҳӣ аз ҷониби кормандони масъули дастгоҳи марказии Хадамоти муҳоҷират ва Раёсати Хадамот дар шаҳри Душанбе пурзур карда шудааст.
Дар рафти суҳбату вохӯриҳо бо шаҳрвандони ҷумҳурӣ, таъкид карда мешавад, ки ҳар як муҳоҷири меҳнатӣ пеш аз ҳама бояд аз қонунҳои Федератсияи Россия дар самти муҳоҷирати меҳнатӣ ҳангоми будубош ё давраи фаъолияти корӣ дар қаламрави ин кишвар огоҳ бошанд.
Инчунин, қайд гардид, ки ҳангоми сафар ҳуҷҷатҳои зарурӣ аз қабили шиносномаи тиббӣ, оиди надоштани бемориҳои сироятӣ, надоштани доғи судӣ ва ҳуҷҷати касбиро ҳатман бо худ гирифтан зарур аст.
Пеш аз сафар ба шуъбаю бахшҳо ва раёсатҳои Хадамоти муҳоҷират дар ҷойи зист муроҷиат намуда, бори дигар вуруди худро ба Федератсияи Россия муайян намуда, баъдан азми сафар намоед.
Ҳамзамон масъалаи дигаре, ки ташвишовар мебошад ин хатарҳои ҷаҳони муосир, аз ҷумла ба гурӯҳҳои тундрави террористию экстремистӣ пайвастани муҳоҷирон ба ҳисоб меравад, ки дар аксар маврид онҳо ба паёмакҳои телефонӣ ва ваъдаҳои бардурӯғи шабакаҳои интернетӣ бовар намуда, ба доми чунин гурӯҳҳо афтида аз ватан дур монда, ҳаёти худро доғдор менамоянд.
Шаҳрвандон як чизро набояд фаромӯш кунанд, ҳангоми дар муҳоҷират будан ба доми гурӯҳҳои одамрабо низ афтодан аз эҳтимол дур нест, чунки онҳо ба ҷалби маблағҳои калон ва ҷойи корӣ хуб ваъда намудан, инсонҳоро қурбонии манфиатҳои худ мегардонанд.
Ба саҳми муҳоҷирон – шаҳрвандони ҷумҳурӣ расонида мешавад, ки дар ҳолати дучор шудан ба чунин мушкилиҳо бояд ба Сафорату Консулгариҳои Ҷумҳурии Тоҷикистон ва Намояндагии Вазорати меҳнат, муҳоҷират ва шуғли аҳолӣ Ҷумҳурии Тоҷикистон дар Федератсияи Россия тавассути телефонҳои боварӣ муроҷиат намоянд.
Дар анҷоми суҳбату вохӯриҳо ба саволҳои сершумори муҳоҷирон ҷавобҳои қаноатбахш дода шуда, ба онҳо маводҳои иттилоотӣ ва буклетҳои роҳнамоӣ ҳангоми сафар, оиди: Тундгаро, экстремист ва террорист киҳоянд ва чаро онро бояд донист? Дар кадом ҳолатҳо шахс ба ҷавобгарӣ кашида мешавад.? тақсим гардида, ба нафароне, ки аз сафар баргаштанд барои дарёфти кори муносиб бо маоши арзанда ба ширкатҳои азими ватанӣ тавсияҳои муфид дода шуд.
Маркази матбуоти Хадамоти муҳоҷират
