Кормандони Шуъбаи баҳисобгирӣ ва хизматрасонӣ ба муҳоҷирон дар ҶСК «Фурудгоҳи байналмилалии Душанбе» ва КВД «Истгоҳи роҳи оҳани шаҳри Душанбе» бо муҳоҷирони меҳнатӣ – шаҳрвандони ҷумҳурӣ ҳангоми сафар ва бозгашти онҳо вохӯриву суҳбатҳо баргузор менамоянд.

Зимни вохӯриҳо бо муҳоҷирони меҳнатӣ оид ба қонунгузории нави Федератсияи Россия дар самти муҳоҷират, донистани забони давлати кабулкунанда, касб, урфу оини онҳо сӯҳбатҳо ороста мешавад. Инчунин, дар толори интизории фурудгоҳ ҳангоми сафар буклетҳо оид ба будубош дар кишвари ФР тақдим карда мешавад. Ин амал мунтазам гузаронида шуда, оид ба будубоши муҳоҷирони меҳнатӣ ва камбудиҳои ҷойдошта дар ин самт ба роҳбарияти Хадамоти муҳоҷират маълумот манзур карда мешавад.

Масъулини Шуъба ба касоне, ки барои кор кардан ба Федератсияи Россия равонаанд тавсия доданд, ки ба қоидаҳои муҳоҷирати бехатар, будубоши муҳоҷирони меҳнатӣ дар хориҷа, воридшавӣ, тарзу роҳҳои гирифтани патент, гирифтани маълумотномаи тиббӣ доир ба надоштани касалиҳои сироятӣ, тарзи супоридани тест ва дигар масъалаҳои мубрами рӯз риоя намоянд.

Бояд гуфт, ки ҳамасола аз ҷониби ташкилотҳои ёрирасони хориҷӣ бо мақсади баланд бардоштани савияи дониши кормандон, такмили ихтисос ва шиносоии кормандон бо таҷҳизоти муосири замонавӣ дар гузаргоҳҳои сарҳадӣ, чанд маротиба вохӯриҳо ва тренингҳо гузаронида шуд, ки кормандони Шуъба фаъолона иштирок намуданд.

Ба ғайр аз ин, барои кумак ва ёрии амалӣ расонидан ба муҳоҷирони меҳнатӣ дар фурудгоҳ буклетҳо, овезаҳо ва тағйиру иловаҳо оид ба қонунгузории Федератсияи Россия маълумотҳо пешкаш карда, инчунин телефонҳои боварӣ шабонарӯзӣ фаъолият менамояд.

Ҳамзамон дар маросими гусели муҳоҷирони меҳнатӣ аз ҷониби кормандони Шуъба маводҳои иттилоотӣ-маърифатӣ таъмин гардида, бо қоидаҳои муҳоҷирати бехатар шинос мешаванд.

Шуъбаи баҳисобгирӣ ва хизматрасонӣ ба муҳоҷирон дар ҶСК «Фурудгоҳи байналмилалии Душанбе» ва КВД «Истгоҳи роҳи оҳани шаҳри Душанбе»-и Раёсати Хадамоти муҳоҷират дар шаҳри Душанбе