27 сентябри соли равон дар шаҳри Душанбе бо ибтикори раёсати Агентии меҳнат ва шуғли аҳолӣ дар шаҳри Душанбе дар ҳамбастагӣ бо  Хадамоти муҳоҷират дар ноҳияи Шоҳмансури пойтахт хиёбони Рӯдакӣ 10 дар назди гулгашти ба номи Куйбишев ярмаркаи ҷойҳои кории холӣ ва вазифаҳои озод доир шуд.

Мақсад аз баргузории ин чорабинии муҳим, пеш аз ҳама фароҳам овардани шароити мусоид ба шаҳрвандони бекор ва муҳоҷирони меҳнатии ба ватан бозгашта, ҷиҳати интихоби кори мувофиқ ва ба кордиҳандагон барои интихоби мутахассисони мавриди талаботашон, ташкил ва баргузор карда шуд.

Тавре аз раёсати Агентии меҳнат ва шуғли аҳолӣ иттилоъ доданд, дар ярмарка корхонаю муассисаҳои ноҳияҳои шаҳри Душанбе фаъолона ширкат намуданд.

Дар он аз тарафи ҶСК “НБО Роғун”, ҶДММ “Ваҳдат Текстайл”, ҶДММ “Ноқили Талко”, ҶСК “Сементи тоҷик”, ҶСП “Телеком технолоҷӣ”, ҶДММ “Ғаюр корея технолоҷӣ”, ҶДММ “Лазолӣ”, ҶДММ “Армон-21”, КВД “Обу корези шаҳри Душанбе”, Агентии хоҷагии ҷангали назди Ҳукумати Ҷумҳурии Тоҷикистон, инчунин соҳаи тандурустӣ ва соҳаи маорифи ноҳияҳои пойтахт ҷойи кории холӣ ва вазифаҳои озод пешниҳод карда шуд.

Дар натиҷаи баргузории ярмаркаи мазкур, дар маҷмӯъ 5000 ҷойи кории холӣ ва вазифаҳои озод ба шаҳрвандон пешниҳод гардид.

Ҳамзамон ба 30 нафар барои ҷойи кор дар корхонаҳои саноатӣ роҳхат дода шуда, 45 нафар ба касбомӯзӣ ҷалб гардиданд.

Ҳамзамон, дар ҷараёни ярмарка аз ҷониби кормандони масъули  Хадамоти муҳоҷират, аз ҷумла МД “Марказҳои машвартӣ ва омодагии пеш аз сафари муҳоҷирони меҳнатӣ” дар шаҳри Душанбе ба зиёда аз 100 нафар иштирокчиёни ярмарка буклетҳо ба миқдори 200 нусха ва корҳои фаҳмондадиҳӣ оид ба ҷалби шаҳрвандон барои кор дар хориҷи кишвар, инчунин дар ширкатҳои сохтмонии Ҷамъияти Саҳомии Кушодаи Неругоҳи Барқи Обии «Роғун» ба роҳ монда, маслиҳатҳои муфид дода шуд.

Тибқи хабари раёсати Агентии меҳнат ва шуғли аҳолӣ дар шаҳри Душанбе, дар ярмаркаи ҷойҳои кори холии баргузоргардида, зиёда аз 500 нафар сокинони пойтахт ва шаҳрвандон иштирок намуданд.

Маркази матбуоти Хадамоти муҳоҷират