Бо ибтикори шуъбаи Хадамоти муҳоҷират дар шаҳри Хуҷанд дар  ҳамкорӣ бо шуъбаи Агентии меҳнат ва шуғли аҳолӣ ярмаркаи ҷойҳои кории холӣ ва вазифаҳои озод дар Литсейи касбии хизматии шаҳри Хуҷанд барои коҳиш додани сатҳи бекорӣ ва беҳтар намудани шароити зиндагии мардум баргузор гардид.

Барои шаҳрвандоне, ки бозпас ё ин ки ихроҷ шудаанду дар ҷустуҷӯи кор ҳастанд, тавсия дода шуд, ки дар чунин ярмаркаҳо фаъолона иштирок намоянд, зеро ин яке аз роҳҳои босамар ва озоди пайдо кардани касбу кори муносиб ба шумор меравад.  

Дар рафти ярмарка аз тарафи мутахассиси пешбари шуъбаи Хадамоти муҳоҷират зимни вохӯрӣ бо шаҳрвандон, вобаста ба муҳоҷирати бехатар, танзими раванди будубоши муваққатӣ, фаъолияти меҳнатии қонунӣ, тартиби ба имзорасонии шартномаи меҳнатӣ, риояи талаботи санитариву гигиенӣ дар зимни фаъолияти корӣ ва дигар масъалаҳои марбут ба самти муҳоҷирати меҳнатӣ дар миёни ҳамватанон ва муҳоҷирони меҳнатӣ муҳокима карда шуд.

Иттилоъ дода шуд, ки ба имзо расонидани шартномаи меҳнатӣ бо корфармо вазъи ҳуқуқии шаҳрвандонро дар кишвари қабулкунандаи қувваи корӣ таъминнамуда, кафолати бехатарӣ дар истеҳсолоти шаҳрванди хориҷиро таъмин менамояд.

Қайд карда шуд, ки муҳлати будубош дар Федератсияи Россия 90 шабонарӯзро дар як соли тақвимӣ дар бар мегирад. Муҳлати мазкур ба

истиснои ворид шудан бо мақсади фаъолияти меҳнатӣ дар қаламрави Федератсияи Россия мебошад. Ба шаҳрвандоне, ки майли сафар ба Федератсияи Россия доранд фаҳмонида шуд, вақте, ки дар корти муҳоҷиратӣ (мигратсионная карта) мақсадро “Работа” қайд менамоед бояд дар муддати 30 рӯз аз рӯзи ворид шудан ба кишвари Россия ҳамаи ҳуҷҷатҳоро ҷамъоварӣ намуда, ба мақомоти минтақавии ВКД ФР бояд супоред. Патентро гирифта, ҳар моҳ пешпардохти андози патентро супоред. Дар асоси патент муҳоҷир метавонад 12 моҳ кор кунад ва бе баромадан аз ҳудуди Россия патенти нав барои соли оянда гирад. Агар муҳоҷир ҳамаи талаботҳоро риоя намояд ҳеҷ кас ӯро аз Россия хориҷ намекунад.

Ҳамзамон, ба шаҳрвандон дар бораи шомил нашудан ба ҳизбу ҳаракатҳои ифротгароӣ, экстремизм ва терроризм ва муқовимат ба савдои одамон ва расонидани кумак ба қурбониёни савдои одамон суҳбатҳо намуда ба ҳар яки онҳо дастурамали мухтасар оиди муҳоҷирати меҳнатӣ, брошюраҳо, варақаҳои иттилоотӣ-маърифатӣ тақсим карда шуд.

Дар идомаи вохӯрӣ вобаста ба гаравиши ҷавонон ва муҳоҷирони меҳнатӣ ба гурӯҳҳои ифротгароӣ, терористиву экстремистӣ, ҷиноӣ, нашъаҷаллобӣ иттилоъ дода шуда, даъват гардид, ки аз ҳар гуна гурӯҳҳои мухолифатангез дурӣ ҷуста, аз бемориҳои сироятшаванда худ ва аъзои оилаи худро эмин нигоҳ доранд.

Раёсати Хадамоти муҳоҷират дар вилояти Суғд