Хадамоти муҳоҷират ба таваҷҷуҳи шаҳрвандони Ҷумҳурии Тоҷикистон мерасонад. Мувофиқи талабот шахсони воқеӣ ҳуқуқ доранд ба ҳудуди Федератсияи Россия маблағҳои нақдиро ба ҳаҷме, ки аз муодили 10 000 доллари ИМА зиёд нест, бе пешниҳоди эъломияи гумрукии мусофир ворид намоянд. Дар ҳолате ки маблағи нақдӣ аз меъёри зикршуда зиёд бошад, пур кардани эъломияи гумрукӣ бо нишон додани тамоми маблағи интиқолшаванда ҳатмӣ мебошад.
Ҳамин гуна қоидаҳо ҳангоми баровардани маблағҳои нақдӣ аз Федератсияи Россия низ амал мекунанд. Бе пешниҳоди эъломия иҷозат дода мешавад, ки маблағи то 10 000 доллари ИМА (бо муодили асъори дигар) аз ҷониби як шахс бароварда шавад. Дар ҳолати аз ин меъёр зиёд будани маблағ, пешниҳоди ҳатмии эъломияи хаттии гумрукӣ талаб карда мешавад. Ҳамзамон, бояд ба назар гирифт, ки дар Россия маҳдудиятҳои иловагии танзими асъор амал мекунанд, ки мувофиқи онҳо баровардани асъори хориҷӣ ба ҳаҷми аз меъёри муқарраргардида зиёд метавонад манъ ё маҳдуд карда шавад. Ҳангоми интиқоли маблағҳои калон, одатан зиёда аз 100 000 доллари ИМА, зарур аст ҳуҷҷатҳое дошта бошед, ки манбаи қонунии ин маблағҳоро тасдиқ менамоянд.
Талаботи мазкур дар асоси меъёрҳои Кодекси гумрукии Иттиҳоди иқтисодии Авруосиё, инчунин санадҳои қонунгузории асъории Федератсияи Россия ва қарорҳои Комиссияи иқтисодии Авруосиё муқаррар карда шудаанд. Бо матни пурраи санадҳои меъёрии ҳуқуқӣ шаҳрвандон метавонанд дар манбаъҳои расмии ҳуқуқии Федератсияи Россия шинос шаванд. Пайванд: https://www.consultant.ru/document/cons_doc_LAW_215315/
Хадамоти муҳоҷират диққати шаҳрвандонро ба зарурати риояи қатъии қоидаҳои зикршуда ҷалб менамояд. Риоя накардани талаботи эъломиякунонии маблағҳои нақдӣ метавонад ба ҷавобгарии маъмурӣ ё ҷиноӣ оварда расонад, аз ҷумла ҷарима ва мусодираи маблағҳои нақдӣ. Барои пешгирӣ аз чунин ҳолатҳо тавсия дода мешавад, ки пеш аз сафар ҳаҷми маблағҳои нақдиро санҷед, дар ҳолати зарурӣ эъломияи гумрукиро пур намоед ва ҳуҷҷатҳои тасдиқкунандаи манбаи маблағҳоро нигоҳ доред. Риояи талаботи қонунгузории Федератсияи Россия имкон медиҳад, ки убури сарҳад бехатар ва бе мушкилот анҷом дода шавад.
Маркази матбуоти Хадамоти муҳоҷират
