Дар даҳсолаҳои охир терроризм ва экстремизм ба яке аз хатарҳои ҷиддии ҷаҳонӣ табдил ёфта, на танҳо амнияти кишварҳои алоҳида, балки суботу оромии тамоми башариятро зери таҳдид қарор додааст. Гарчанде ҷомеаи ҷаҳонӣ таҷрибаи талхи мубориза бо шаклҳои суннатии терроризмро аз сар гузаронида бошад ҳам, имрӯз ин зуҳурот бо чеҳра ва усулҳои нав зуҳур мекунад, ки ошкору пешгирии онро боз ҳам мураккаб мегардонад.

Экстремизми муосир дигар танҳо дар шакли гурӯҳҳои мусаллаҳ ё амалҳои зӯроварона маҳдуд намешавад. Он бештар бо истифода аз фазои иттилоотӣ, шабакаҳои иҷтимоӣ, таблиғоти идеологӣ ва равандҳои равонӣ паҳн шуда, хусусан ҷавононро ҳадаф қарор медиҳад. Гурӯҳҳои ифротӣ аз ноогоҳӣ, мушкилоти иҷтимоӣ, бекорӣ ва эҳсоси беадолатӣ суистифода намуда, андешаҳои радикалиро ҳамчун «роҳи ҳалли мушкилот» муаррифӣ мекунанд.

Хатари асосии шакли нави экстремизм дар он аст, ки он зери ниқоби дин, адолат, озодӣ ё ҳатто фарҳанг зуҳур карда, ҷомеаро аз дарун заиф месозад. Ин раванд метавонад боиси афзоиши низоъҳои дохилӣ, шикасти арзишҳои миллӣ ва коста гардидани эътимод ба давлату ҷомеа гардад.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон борҳо дар суханрониҳо ва Паёмҳои худ ба Маҷлиси Олӣ аз хатарҳои афзояндаи ҷаҳони муосир, аз ҷумла терроризму экстремизм, изҳори нигаронӣ намудаанд. Дар Паёми навбатии худ Сарвари давлат чунин таъкид намуданд: “Вазъи мураккаб дар манотиқи гуногуни дунё, шиддат гирифтани рақобатҳои геосиёсӣ ва геоиқтисодӣ ба хотири аз нав тақсим кардани ҷаҳон, мавҷи нави “ҷанги сард”, яроқнокшавии бошитоб, заиф гардидани меъёрҳои ҳуқуқи байналмилалӣ ва дигар равандҳои пуртазод дар арсаи байналмилалӣ ҳамоно мояи нигаронӣ боқӣ мемонад”.

Ин таъкиди Пешвои миллат ба таври равшан нишон медиҳад, ки мубориза бо терроризм ва экстремизм танҳо вазифаи як давлат нест, балки масъулияти муштараки ҷомеаи ҷаҳонӣ мебошад. Тоҷикистон, ҳамчун кишвари сулҳдӯст, дар сатҳи байналмилалӣ ташаббусҳои зиёдеро барои таҳкими амният, пешгирии радикализатсия ва густариши ҳамкориҳои минтақавӣ пешниҳод намудааст.

Валӣ Валиев,

Мудири бахши муҳоҷирати ноҳияи Мастчоҳ