Бо ибтикори бахши Хадамоти муҳоҷират дар ноҳияи Ашт дар маркази саломатии Ҷамоати деҳоти Шодоба бо иштироки кормандони соҳаи тандурустӣ, ки оилаи муҳоҷирони меҳнатӣ мебошанд, вохӯрии иттилоотӣ баргузор гардид.
Дар вохӯрии мазкур намояндаи бахши Хадамоти муҳоҷират дар ноҳияи Ашт оид ба пешгирии бемориҳои сироятӣ, аз ҷумла вируси норасоии масунияти одам (ВНМО), суханронӣ намуд.
Зимни баромад таъкид гардид, ки пешгирии бемориҳои сироятӣ, махсусан ВНМО, яке аз самтҳои муҳими ҳифзи саломатии аҳолӣ буда, баланд бардоштани маърифати тиббӣ ва риояи қоидаҳои беҳдоштӣ дар коҳиш додани хатари паҳншавии ин бемориҳо нақши муҳим дорад.
Ҳамчунин ба иштирокчиён оид ба роҳҳои сироятёбӣ, усулҳои пешгирии ВНМО, аҳамияти гузаштани ташхиси ихтиёрӣ ва саривақтӣ, инчунин худдорӣ аз рафторҳои хатарнок маълумоти муфассал пешниҳод карда шуд. Ба муҳоҷирони меҳнатӣ ва аъзои оилаи онҳо тавсия дода шуд, ки пеш аз сафар ва баъди бозгашт аз хориҷи кишвар ба саломатии худ диққати ҷиддӣ дода, дар ҳолати зарурат аз муоинаи тиббӣ гузаранд.
Дар анҷоми вохӯрӣ миёни иштирокчиён мубодилаи афкор сурат гирифта, ба саволҳои пешниҳодшуда ҷавобҳои мушаххас дода шуданд.
Маркази матбуоти Хадамоти муҳоҷират
