Бо ибтикори шуъбаи Хадамоти муҳоҷират дар шаҳри Турсунзода бо иштироки муовини якуми сардори Хадамоти муҳоҷират Шарифзода Маҳмадсалим Пир, намояндаи Муассисаи давлатии “Агентиии бакортаъминкунӣ дар хориҷа”, намояндаи ширкати Ҷамъияти саҳомии “Пермтрансжелезобетон”-и водии Перми Федератсияи Россия, сардори Раёсати Агентии мещнат ва шуғли аҳолӣ дар шаҳри турсунзода вохӯрии самимӣ бо сокинони шаҳр, ки қисми зиёди онро волидайни муҳоҷирони меҳнатӣ ташкил медиҳад, баргузор гардид.
Дар вохӯрии мазкур, муовини якуми сардори Хадамоти муҳоҷират Шарифзода Маҳмадсалим Пир баромад намуда, вобаста ба масъалаҳои муҳими муҳоҷиратӣ суханронӣ намуд. Аз ҷумла, вобаста ба муҳоҷирати бехатар, риояи талаботҳои қонунгузории нави Федератсияи Россия дар самти муҳоҷират, расман фаъолият намудан, тартиби дарёфти ҷойи кори доимӣ, таъмини амнияти бехатарӣ дар фаъолияти меҳнатӣ ва дигар масъалаҳои муҳим дар ин самтро ба сокинони шаҳри Турсунзода маълумот доданд.
Зикр гардид, ки риояи талаботҳои қонунгузории кишвари иқомат зимни муҳоҷирати меҳнатӣ дар Федератсияи Россия кафолати фаъолияти меҳнатиро фароҳам оварда, имконият ва бехатарӣ дар фаъолияти меҳнатиро таъмин менамояд.
Дар идомаи вохӯрӣ оид ба хатару таҳдидҳои замони муосир, пешгирӣ аз шомилшавӣ ба ҳизбу ҳаракатҳои иртиҷоӣ, гурӯҳҳои террористиву экстремистӣ, эҳтиёт будан аз бемориҳои сироятӣ, дӯст доштани фарҳанг, таърих ва арзишҳои фарҳангии халқи тоҷик, ҳифзи расму оин ва анъанаҳои миллӣ дар хориҷи кишвар, баланд бардоштани ҳисси ватандӯстӣ, ифтихори миллӣ ва дигар масъалаҳои мубрами рӯз, ибрози назар намуданд.
Инчунин, зикр гардид, ки дар талаботҳои қонунгузории кишвари Россия тағийротҳои зиёд дар самти муҳоҷирати меҳнатӣ ворид гардида, шаҳрвандонро зарур аст, ки меъёрҳои муайяншударо риоя намуда, баъди ба даст овардани иҷозатномаи фаъолияти меҳнатӣ бо корфармо шартномаи меҳнатӣ ба имзо расонида, дар мақомоти салоҳиятдор оид ба бастани шартномаи меҳнатӣ огоҳинома манзур намоянд.
Дар ин замина аз волидайни муҳоҷирони меҳнатӣ даъват ба амал оварда шуд, ки ба фарзандони худ расонанд, ки зимни муҳоҷирати меҳнатӣ меъёрҳои бехатарӣ дар истеҳсолотро риоя намуда, бехатарии саломатии худ ва дигар ҳамватанонро таъмин намоянд.
Дар ҷараёни вохӯрӣ ба самъи сокинон расонида шуд, ки он шаҳрвандоне, ки айни замон аз кишвари Россия ба Ватан баргаштаанд, дар таъмин намудани онҳо бо вакансияҳои ҷойи кории холӣ дар ширкатҳои ватанӣ, инчунин ба касбомӯзӣ ва забономӯзӣ ҷалб намудани онҳо дар муассисаҳои таълимии Вазорати меҳнат, муҳоҷират ва шуғли аҳолии Ҷумҳурии Тоҷикистон тавсияҳои муфид доданд.
Дар фарҷоми вохӯрӣ намояндаи ширкати Ҷамъияти саҳомии “Пермтрансжелезобетон”-и водии Перми Федератсияи Россия дар мавзуъҳои мақсад маром ва самтҳои фаъолияти ширкат шинос намудани корҷӯён бо шарту шароити пешниҳоднамудаи корфармоён ва дигар масъалаҳо суханронӣ намуданд.
Маркази матбуоти Хадамоти муҳоҷират
