Бо ибтикори шуъбаи Хадамоти муҳоҷират дар шаҳри Панҷакент бо мақсади баланд бардоштани маърифати ҳуқуқии шаҳрвандон, пешгирии зуҳуроти номатлуб дар байни занҳо ва паст намудани шиддати муҳоҷирати меҳнатӣ, баланд бардоштани сатҳи огоҳии шаҳрвандони нияти сафари корӣ ба хориҷи кишвардошта вохӯрии иттилоотию маърифатӣ баргузор гардид.
Ҳадафи асосии ҷамъомад кушодани уфуқҳои нави ҳамкории сохторҳои давлатӣ бо аҳолӣ, огоҳсозии сокинон аз қоидаҳои муҳоҷирати меҳнатии қонуниву бехатар ва пешгирии ҳолатҳои номатлуб, аз ҷумла муҳоҷирати ғайриқонунӣ буд.
Дар ҷараёни вохӯрӣ нахуст масъалаи омодагии ҳамаҷонибаи шаҳрвандон ба муҳоҷирати меҳнатӣ мавриди таваҷҷуҳ қарор гирифта, оид ба зарурати анҷом додани сафар ба хориҷи кишвар бо риояи талаботи қонунгузорӣ ва дар доираи тартиботи муқарраргардида андешаҳои муфассал баён карда шуданд.
Таъкид гардид, ки қабл аз сафар ҳар як шаҳрванд бояд аз ҷиҳати ҳуҷҷатгузорӣ, интихоби ҷойи кор ва донистани қоидаҳои кишвари қабулкунанда омодагии зарурӣ дошта бошад. Ба сокинон фаҳмонида шуд, ки пеш аз сафар бояд ҳолати ҳуҷҷатҳои шахсӣ, муҳлати эътибори шиноснома ва дигар санадҳои зарурӣ бодиққат санҷида шаванд.
Ҳамзамон, тавсия дода шуд, ки нусхаҳои ҳуҷҷатҳои муҳим дар ҷойи алоҳида ва бехатар нигоҳ дошта шуда, шаҳрванд дар бораи суроғаи ҷойи кор, корфармо, маҳалли истиқомат ва роҳҳои тамос бо шахсони масъул маълумоти дақиқ дошта бошад.
Инчунин, ба масъалаи пешгирии ҳолатҳои фиреб, қаллобӣ ва сӯиистифода аз эътимоди шаҳрвандон таваҷҷуҳи ҷиддӣ зоҳир карда шуд. Ба иштирокчиён фаҳмонида шуд, ки ҳангоми ҷустуҷӯи ҷойи кор дар хориҷи кишвар набояд танҳо ба ваъдаҳои шахсони алоҳида ё миёнаравони ношинос такя намуд. Пеш аз қабули қарор оид ба сафар, супоридани маблағ ё пешниҳоди ҳуҷҷатҳои шахсӣ бояд маълумоти пешниҳодшуда санҷида шуда, қонунӣ будани фаъолияти шахс ё ташкилоти миёнарав муайян карда шавад.
Дар идомаи суҳбат ба масъалаи пешгирии савдои одамон (қочоқи инсон, пешгирии зуроварӣ дар оила, пешгири аз ҷинояткорӣ ва нашъамандӣ, ҳолатҳои коррупсионӣ дошта ва пешгирии экстремизм ва терроризм), инчунин, шаклҳои истисмори меҳнатӣ маълумоти зарурӣ пешниҳод гардид.
Таъкид шуд, ки шаҳрвандон ҳангоми қабули пешниҳоди кор дар хориҷи кишвар бояд дар бораи шахсияти корфармо, номи ташкилот, суроғаи ҷойи кор, шароити меҳнат ва истиқомат, инчунин тартиби пардохти музди меҳнат маълумоти мушаххас дошта бошанд.
Иштирокчиён ҳушдор дода шуданд, ки пешниҳоди кори дорои музди ғайриоддии баланд, бе талаботи муайян ва бе бастани шартномаи расмӣ метавонад нишонаи фиреб ё истисмори минбаъда бошад.
Маркази матбуоти Хадамоти муҳоҷират
