Бо мақсади баланд бардоштани сатҳи маърифати ҳуқуқӣ ва иҷтимоии шаҳрвандон, кормандони бахши Хадамоти муҳоҷират дар ноҳияи Шаҳринав суҳбату вохӯриҳоро бо шаҳрвандон – муҳоҷирони меҳнатии ба Ватан бозгашта ва шаҳрвандоне, ки нияти сафар ба хориҷи кишвар доранд, дар ҳудуди ноҳия ҳама руза мунтазам баргузор намуда истодаанд. Чунин як вохӯрӣ дар бозори Панҷшанбе Ҷамоати дехоти ба номи А. Ҳасанов бо сокинон доир гашт.

Дар рафти суҳбату вохӯрӣ аз ҷониби кормандони бахши Хадамоти муҳоҷират оид ба масъалаҳои касбомӯзӣ, омӯзиши забонҳои хориҷӣ ва фароҳамсозии имкониятҳои шуғли шаҳрвандон дар дохили кишвар таваҷҷуҳи хосса зоҳир карда шуд.

Дар ин замина, ба шаҳрвандон иттилоъ дода шуд, ки дар назди Муассисаи давлатии “Марказҳои машваратӣ ва омодагӣ пеш аз сафари муҳоҷирони меҳнатӣ” дар шаҳри Душанбеи Хадамоти муҳоҷират курсҳои омӯзиши забони русӣ ба таври ройгон ба роҳ монда шудаанд. Шаҳрвандони хоҳишманд метавонанд аз ин имконият истифода намуда, ҷиҳати такмили донишу малакаҳои забонии худ дар курсҳои мазкур иштирок намоянд. Зикр гардид, ки омӯзиши забони русӣ барои шаҳрвандоне, ки нияти сафар ба хориҷи кишвар ва фаъолияти меҳнатӣ доранд, яке аз омилҳои муҳими мутобиқшавӣ ба муҳити иҷтимоиву меҳнатӣ ва ҳифзи ҳуқуқу манфиатҳои онҳо ба ҳисоб меравад.

Инчунин, дар ҷараёни вохӯрӣ сокинони ноҳия таъкид карда шуданд, ки тибқи талаботҳои қонунгузории Федератсияи Россия шаҳрвандони хориҷӣ дар муҳлати ду моҳ пас аз гирифтани иҷозатномаи фаъолияти меҳнатӣ (патент) вазифадоранд, ки ба раёсати шаҳру ноҳиявии Вазорати корҳои дохилии ФР ҷойи зисти худ оид ба имзо расонидани шартномаи фаъолияти меҳнатӣ бо корфармо маълумот манзур намоянд.

Дар ҳолати риоя нагардидани талаботи қонунгузории кишвари иқомат шаҳрванди хориҷӣ дар Федератсияи Россия вазъи ҳуқуқии худро аз даст дода, ҳуҷҷатҳои ба дастоварда дар самти фаъолияти меҳнатӣ ба таври худкор бекор карда шуда, шаҳрванд ба Феҳристи шахсони назоратшаванда ворид карда мешавад.

Маркази матбуоти Хадамоти муҳоҷират