Дар доираи суҳбату вохӯриҳо бо сокинон бахши Хадамоти муҳоҷират дар шаҳри Ваҳдат ҷиҳати иҷроиши талаботҳои қонунгузории Федератсияи Россия дар самти муҳоҷирати меҳнатӣ баррасӣ гардид.

Зимни вохӯрӣ бо сокинони шаҳр мудири бахши Хадамоти муҳоҷират Асозода Сарабек Асо риояи талаботҳои қонунгузории кишвари иқомат, танзими раванди муҳоҷирати меҳнатии қонунӣ, фаъолияти расмӣ дар доираи меъёрҳои муайннамудаи кишвари қабулкунандаи қувваи корӣ, инчунин танзими бехатарӣ дар истеҳсолот, тартиби бастани шартномаи меҳнатӣ бо корфармо тавсия ва машваратҳои муфид дода шуд.

Зикр гардид, ки расман фаъолият намудан, риояи талаботҳои қонунгузории кишвари иқомат имконият медиҳад, ки шаҳрванди хориҷӣ дар кишвари қабулкунандаи корӣ бехатарии фаъолияти меҳнатӣ ва танзими будубоши худро риоя намуда, кафолатҳои ҳуқуқии шаҳрванди хориҷиро таъмин менамояд.

Дар идомаи вохӯрӣ вобаста гурӯҳҳои ифротгароию тундгароӣ, пешгирӣ аз шомилшавӣ ба гурӯҳҳои иртиҷоӣ ва даҳшатафкан, тамошо намудани барномаҳои хатарафзои интернетӣ, оқилона дуруст истифода бурдани шабакаҳои иҷтимоӣ, пешгирӣ аз ҷинояткорӣ дар миёни шаҳрвандон – муҳоҷирони меҳнатӣ тавсия ва машваратҳои муфид дода шуд.

Таъкид гардид, ки шаҳрвандони ҷумҳуриро зарур аст, ки берун аз соатҳои корӣ ба омӯзиш машғул шуда, ба курсҳои касбомӯзӣ, тамошои осорхона ва театр, боздид аз минтақаҳои сайёҳиву таърихии минтақаи мазкур намуда, дониш ва малакаҳои худро баланд бардошта, дар бозори меҳнати кишвари қабулкунандаи қувваи корӣ худро ҳамчун мутахассиси ботаҷриба нишон диҳанд.

Дар ин замина, ба шаҳрвандон иттилоъ дода шуд, ки дар назди МД “Марказҳои машваратӣ ва омодагӣ пеш аз сафари муҳоҷирони меҳнатӣ” дар шаҳри Душанбеи Хадамоти муҳоҷират курси омӯзиши забони русӣ ба таври ройгон ба роҳ монда шудааст. Шаҳрвандони хоҳишманд метавонанд аз ин имконият истифода намуда, бо мақсади такмили донишу малакаи забонии худ дар курсҳои мазкур иштирок намоянд. Таъкид гардид, ки донистани забони русӣ барои шаҳрвандоне, ки нияти сафар ба хориҷи кишвар ва фаъолияти меҳнатӣ доранд, аз аҳамияти муҳим бархӯрдор мебошад.

Дар анҷоми вохӯрӣ ба сокинон вобаста ба талаботҳои қонунгузорӣ, тартиби воридшавӣ ба Федератсияи Россия, кафолатҳои ҳуқуқии муҳоҷирони меҳнатӣ ва дигар масъалаҳо вобаста ба самти мазкур саволҳои худро пешниҳод намуда, аз ҷониби кормандони бахши Хадамоти муҳоҷират посухҳои мушаххас гирифтанд.

Маркази матбуоти Хадамоти муҳоҷират