15 октябри соли равон, тибқи нақша дар идомаи сафари корӣ намояндагони Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе ва Маркази захиравии муҳоҷирон (ICMPD), бо дастгирӣ ва мусоидати роҳбарияти мақомоти иҷроияи ҳокимияти давлатии ноҳияи Ванҷ, бо иштироки муовини Раиси ноҳия Лавунчазода Ганҷина дар бинои КИ ҲХДТ бо фаъолон ва сокинони ноҳия вохӯрии судманд баргузор гардид.
Дар ҷараёни мулоқот иштирокдорон оид ба тартиби истифодаи замимаи мобилии «Амина» маълумот гирифтанд. Зикр гардид, ки тибқи маълумоти пешниҳодшуда, аз 1 сентябри соли 2026 доираи истифодаи замимаи мазкур дар шаҳри Москва ва вилояти он васеъ гардида, он барои бақайдгирии ҷойи зисти категорияҳои нави шаҳрвандони хориҷӣ, ки ба Федератсияи Россия бе раводид ворид мешаванд, пешбинӣ шудааст.
Инчунин, дар идомаои вохӯрӣ ба шаҳрвандоне, ки нияти сафар ба Федератсияи Россияро доранд, тавсия дода шуд, ки ҳангоми муроҷиат ба миёнаравон, агентҳои хусусӣ ва шахсони пешниҳодкунандаи хизматрасониҳо дар самти дарёфти ҷойи кор, тамдиди бақайдгирӣ, гирифтани патент ва дигар ҳуҷҷатҳои иҷозатномавӣ эҳтиёткор бошанд.
Таъкид гардид, ки баъзе шахсони бевиҷдон худро кормандони мақомоти давлатӣ ё шарикони расмӣ муаррифӣ намуда, бо пешниҳоди маълумоти бардурӯғ ваъдаи хизматрасониҳои гуногун медиҳанд ва аз шаҳрвандон маблағ талаб мекунанд. Аз ин рӯ, пеш аз пардохти маблағ ва супоридани ҳуҷҷатҳои шахсӣ, шаҳрвандон бояд эътимоднокӣ ва қонунӣ будани фаъолияти шахс ё ташкилоти хизматрасонро санҷанд.
Дар фарҷоми вохӯрӣ ба самъи иштирокдорон расонида шуд, ки огоҳӣ аз талаботи қонунгузории муҳоҷиратӣ, омодагии пешакӣ ба сафар, санҷиши ҳуҷҷатҳо ва истифодаи манбаъҳои расмии иттилоотӣ аз омилҳои муҳими пешгирии мушкилот ва таъмини будубоши қонунӣ дар кишвари қабулкунанда ба ҳисоб мераванд.
Бояд тазаккур дод, ки чунин вохӯриҳои машваратӣ барои баланд бардоштани маърифати ҳуқуқии шаҳрвандон, пешгирии муҳоҷирати ғайриқонунӣ ва коҳиш додани хавфи қаллобӣ мусоидат намуда, ба омодагии дурусти шаҳрвандон ба сафар ва ҳифзи ҳуқуқу манфиатҳои онҳо равона шудаанд.
Маркази матбуоти Хадамоти муҳоҷират
