Конститутсияи Ҷумҳурии Тоҷикистон 6-уми ноябри соли 1994 бо роҳи раъйпурсии умумихалқӣ қабул гардидааст. Қабули ин санади тақдирсоз барои таҳкими истиқлолияти давлатӣ, пойдории сулҳу субот ва рушди ҷомеаи демократӣ заминаи муҳим гузошт.
Конститутсия қонуни асосии давлат буда, тамоми қонунҳо ва санадҳои ҳуқуқии дигар дар асоси он қабул карда мешаванд. Дар он сохтори давлат, фаъолияти мақомоти давлатӣ, ҳуқуқу озодиҳо ва вазифаҳои шаҳрвандон муайян гардидаанд. Мувофиқи Конститутсия, Ҷумҳурии Тоҷикистон давлати соҳибихтиёр, демократӣ, ҳуқуқбунёд, дунявӣ ва ягона мебошад.
Яке аз муҳимтарин арзишҳои Конститутсия ҳифзи ҳуқуқу озодиҳои инсон ва шаҳрванд мебошад. Ҳар як инсон ҳуқуқ ба зиндагӣ, таҳсил, меҳнат, истироҳат ва озодии сухан дорад. Ҳамчунин, Конститутсия баробарии ҳамаи шаҳрвандонро дар назди қонун кафолат медиҳад. Ин арзишҳо барои бунёди ҷомеаи адолатпарвар ва пешрафта аҳамияти бузург доранд.
Конститутсия на танҳо ҳуқуқҳои шаҳрвандонро муайян мекунад, балки вазифаҳои онҳоро низ баён менамояд. Ҳар як шаҳрванд бояд Ватани худро дӯст дорад, қонунҳоро риоя намояд, ба муқаддасоти миллӣ эҳтиром гузорад ва дар ободии кишвар саҳм гузорад. Ҳифзи сулҳу субот ва ваҳдати миллӣ низ вазифаи муҳимми ҳар як сокини Тоҷикистон мебошад.
Ҷавонон, ки ояндаи давлату миллат мебошанд, бояд Конститутсияро хуб омӯзанд ва ҳуқуқу вазифаҳои худро донанд. Зеро донистани қонунҳо ба ҳар як шахс имкон медиҳад, ки дар ҷомеа мавқеи худро дуруст муайян намояд ва ҳамчун шаҳрванди масъулиятшинос ба камол расад.
Рӯзи Конститутсия барои ҳар як шаҳрванди Тоҷикистон рӯзи ифтихор ва арҷгузорӣ ба арзишҳои миллӣ мебошад. Ин рӯз моро водор месозад, ки ба қадри истиқлолият, сулҳу оромӣ ва ваҳдати миллӣ бештар расем. Зеро танҳо дар фазои сулҳу субот метавон ба рушди иқтисодӣ, иҷтимоӣ ва фарҳангии кишвар ноил гардид.
Конститутсияи Ҷумҳурии Тоҷикистон рамзи давлатдорӣ, соҳибихтиёрӣ ва озодии миллати тоҷик мебошад. Он ҳамчун бахтномаи миллат роҳи рушди устувор ва зиндагии осоиштаи мардумро муайян менамояд. Мо, шаҳрвандони Тоҷикистон, бояд ин санади муқаддасро эҳтиром намуда, барои ҳифзи арзишҳои он ва пешрафти Ватани азизамон саҳми арзандаи худро гузорем.
Додихудоева Дилафрӯз,
Мутахассиси пешбари бахши муҳоҷирати дохилӣ ва экологӣ Раёсати Хадамоти муҳоҷират дар шаҳри Душанбе
