Кормандони масъули дастгоҳи марказии Хадамоти муҳоҷират якҷоя бо Раёсати Хадамоти муҳоҷират дар шаҳри Душанбе дар “Фурудгоҳи байналмилалии шаҳри Душанбе” ҷиҳати тақвият додани корҳои фаҳмондадиҳӣ дар байни муҳоҷирони меҳнатӣ, вобаста ба муҳоҷиратӣ бехатар, пешгирии пайвастани муҳоҷирон ба сафи гурӯҳҳои ифротгароии динӣ, савдои одамон, бо кор таъмин намудани шаҳрвандон дар ширкатхои ватанӣ, инчунин ҷалб намудани онҳо ба касбомӯзӣ, пайваста корбарӣ намуда истодаанд.

Зимни вохӯрӣ вобаста ба талаботҳои қонунгузории кишвари иқомат дар самти муҳоҷирати бехатар, расман фаъолият намудан дар кишвари қабулкунандаи қувваи корӣ, риояи талаботҳои бехатарӣ дар истеҳсолот, ба имзо расонидани шартномаи меҳнатӣ бо корфармо, нигоҳдории вазъи саломатию пешгирӣ аз бемориҳои сироятӣ тавсияҳои муфид дода шуд.

Бори дигар шаҳрвандонро таъкид намуданд, ки барои шаҳрвандони хориҷӣ дар Федератсияи Россия рӯзҳои кам ба шумор мондааст, ки вазъи ҳуқуқии худро ба танзим дароранд. Дар ҳолати ба танзим даровардани будубоши худ шаҳрвандони хориҷӣ аз Феҳристи шахсони назоратшавандаи Вазорати корҳои дохилии Федератсияи Россия хориҷ карда мешаванд.

Хотирасон менамоем, ки аз 5 феврали соли 2025 нисбати шаҳрвандони хориҷӣ, ки ғайриқонунӣ дар ҳудуди Федератсияи Россия қарор доранд, раванди ихроҷи онҳо амалӣ шуда истодааст.

Дар асоси Фармони Президенти Федератсияи Россия аз 30 декабри соли 2024, № 1126 шаҳрвандони хориҷие, ки дар Феҳристи шахсони назоратшаванда қарор доранд, метавонанд то 30 апрели соли 2025 вазъи ҳуқуқии худро ба танзим дароранд. Барои қонунигардонӣ шаҳрвандони хориҷӣ метавонанд ба ниҳодҳои мазкур муроҷиат намоянд:

– Ба раёсати ноҳиявии Вазорати корҳои дохилии Федератсияи Россия вобаста ба ҷойи зист;

– Шуъбаҳои Корхонаи воҳиди федералии давлатии «ХШР»-и Вазорати корҳои дохилии Федератсияи Россия;

– Маркази бисёрсоҳавии “Сахарово” (барои шаҳрвандони хориҷие, ки дар шаҳри Москва қарор доранд).

Ҳуҷҷатҳое, ки барои будубоши расмӣ ҳатмӣ мебошанд:

– Корти биометрӣ;

– Муоинаи тиббӣ (ҷиҳати мавҷуд набудани бемориҳои сироятӣ,

–   Истеъмоли маводи нашъадор ва моддаҳои психотропӣ);

– Мавҷуд набудани қарзҳои пардохтнашуда оид ба боҷ, андоз,

 ҷарима ва дигар пардохтҳои ҳатмӣ.

Пас аз 1 майи соли 2025 масъалаи танзими вазъи ҳуқуқии шаҳрвандони хориҷӣ дар Федератсияи Россия ғайриимкон хоҳад буд ва тамоми чораҳои пешбининамудаи қонун вобаста ба ихроҷ, инчунин манъи вуруд ба Россия дар оянда нисбати хориҷиёне, ки вазъи ҳуқуқии худро танзим накардаанд, татбиқ карда мешавад.

Инчунин, ба шаҳрвандон вобаста ба хатару таҳдидҳои замони муосир, фаъолияти ташкилотҳои террористиву экстремистидошта, пешгирӣ аз ҷинояту ҷинояткорӣ, риояи ҳолатҳои санитариву гигиенӣ, хатари бемориҳои сироятӣ ва роҳҳои сияротшавии шаҳрвандон машварат дода шуд.Дар охир ба суолњои сершумори муњољирони мењнатї аз ҷониби иштирокдорон љавобњои мушаххас дода шуда, ба онҳо брошюраҳои Хадамоти муҳоҷират оид ба “Тундгаро, экстремист ва терорист киҳоянд ва чаро онро бояд донист?”, “Дар кадом ҳолатҳо шахс ба ҷавобгарӣ кашида мешавад?” тақсим карда шуд.

Чунин вохӯрии судманд дар назди собиқ бозори Султони Кабир бо сокинон, корҷӯён ва муҳоҷирони ба ватан бозгашта аз ҷониби Раёсати Хадамоти муҳоҷират дар шаҳри Душанбе гузаронида шуд.

Маркази матбуоти Хадамоти муҳоҷират