Коррупсия дар замони муосир ба яке аз проблемаҳои глобалии ҷаҳон мубаддал гардидааст.
Новобаста аз тадбирҳои дар ин самт адешидаи давлатҳои ҷудогона ва созмонҳои бонуфузи байналмилалӣ солҳои охир коррупсия ҳамчун падидаи номатлуби иҷтимоӣ ҷомеаи ҷаҳониро ба ташвиш овардааст.
Дар давраи соҳибистиқлолии кишвари мо аз ҷониби Сарвари давлат ба муқовимат бо коррупсия диққати махсус дода шуда, барои амалӣ намудани сиёсати зиддикоррупсионии давлат заминаҳои ташкилию ҳуқуқии зарурӣ ва шароити мусоид фароҳам оварда шудааст. Нақши ҷомеаи шаҳрвандӣ баробари фаъолияти муназзами мақомотҳои давлатӣ дар татбиқи сиёсати зиддикоррупсионӣ муҳим арзёбӣ мегардад.
Сабабҳои мавҷудияти коррупсия аз тарафи коршиносон мавриди таҳлил ва баррасӣ қарор дода шуда, аксари онҳо ба хулоса омаданд, ки ин падидаи номатлуб аз ҷанбаҳои сиёсӣ, иқтисодӣ, иҷтимоӣ ва ахлоқӣ вобастагӣ дорад.
Ангезаи асосии содир намудани ҷиноятҳо ва ҳуқуқвайронкуниҳои ба коррупсия алоқаманд ҳарисии оддии инсон мебошад. Маҳз, эҳсоси ҳирс инсонро барои содир намудани кирдорҳои коррупсионӣ водор намуда, барои мадди назар кардани принсипҳои ахлоқӣ мусоидат менамояд.
Дар даврони соҳибистиқлолии Ҷумҳурии Тоҷикистон баробари инкишофи дигар соҳаҳои хоҷагии халқ тақвияти фаъолияти зиддикоррупсионии ҷомеа ва сохторҳои давлатиро мушоҳида менамоем. Зеро дар партави сиёсати хирадмандонаи Президенти Ҷумҳурии Тоҷикистон ҷиҳати муқовимат бо коррупсия мунтазам чораҳои мақсаднок роҳандозӣ гардида, барои ба вуҷуд овардани фазои зиддикоррупсионӣ пайваста заминаҳои ташкиливу ҳуққуқӣ амалӣ мегардад.
Дар заминаи такмил додани қонунгузории зиддикоррупсионии кишвар аз ҷониби парлумони давлат Қонуни Ҷумҳурии Тоҷикистон “Дар бораи муқовимат бо коррупсия” 7-уми августи соли 2020 дар таҳрири нав қабул ва мавриди амал қарор дода шуд. Мутобиқи муқаррароти ин санади меъёрии ҳуқуқӣ пешгирии коррупсия яке аз чораҳои муқовимат ба коррупсия маҳсуб дониста мешавад.
Чораҳои пешгирикунанда, рафъи омилҳо ва шароити зуҳури коррупсия дар татбиқи сиёсати зиддикоррупсионӣ мавқеи муҳимро ишғол менамояд. Зеро мақсади ниҳоӣ аз мубориза бо ин падидаи манфур устувор намудани арзишҳои демократӣ дар ҷомеа, таъмини волоияти қонун, эҳтироми ҳуқуқи инсон ва пешгирӣ кардани паёмадҳои ногувори он мебошад.
Қайд кардан бамаврид аст, ки муқовимат ба коррупсия кори дастаҷамъона буда, дар он мақомоти давлатӣ дар ҳамбастагӣ бо ҷомеаи шаҳрвандӣ ва бо иштироки ҳар як фарди ҷомеа метавонад натиҷаҳои дилхоҳро ба даст оварад ва болоравии коррупсияро коҳиш диҳад.
Дар ин ҷода Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бамаврид қайд намуданд: “Фаромӯш набояд кард, ки мубориза ба муқобили коррупсия фақат вазифаи мақомоти ҳифзи ҳуқуқ нест. Дар ин мубориза тамоми аҳли ҷомеа, ҳар як шаҳрванд ва ҷомеаи шаҳрвандӣ низ бояд бетараф набошад”.
Ҳамин тариқ, мубориза бо коррупсия фаъолияти дастаҷамъист ва ҳамоҳангии имконияту талошҳои ҳамаи мақомоти масъули давлатӣ, ниҳодҳои ҷомеаи шаҳрвандӣ, бахши хусусӣ ва дар маҷмӯъ, ҳамаи қишрҳои ҷамъиятро тақозо дорад. Боло бурдани савияи огоҳии ҳуқуқии аҳолӣ дар хусуси коррупсия, нишона ва паёмадҳои ногувори он як ҷанбаи муҳими коҳиш додани зуҳуроти коррупсионӣ мебошад.
Бобоназарзода Санавбар,
Сардори шуъбаи муҳоҷирати меҳнатӣ Раёсати Хадамоти муҳоҷират дар шаҳри Душанбе
