Бо ташаббуси Раёсати Хадамоти муҳоҷират дар вилояти Хатлон чорабинии навбатии иттилоотӣ-маърифатиро бо сокинони Ҷамоати деҳоти Гулистони шаҳри Левакант баргузор карда шуд.

Зимни баромад муовини сардори раёсати Хадамоти муҳоҷират дар вилояти Хатлон Хайридинзода Исфандиёр оид ба шарҳу тавзеҳи Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон дар бораи самтҳои асосии сиёсати дохилӣ ва хориҷӣ иброзӣ андеша намуд.

Аз ҷумла, қайд карда шуд, ки Паёми Президенти Ҷумҳурии Тоҷикистон ба Маҷлиси Олӣ дар баланд бардоштани сатҳи некуаҳволии мардум, тақвияти ҳифзи иҷтимоии аҳолӣ, ҳимояи ҳуқуқу озодиҳои инсон ва шаҳрванд, паст намудани сатҳи камбизоатӣ, инкишофи соҳаҳои гуногуни ҳаёти мамлакат ва дар рушди Тоҷикистони соҳибистиқлол нақши бориз дорад.

Паёми Президенти Ҷумҳурии Тоҷикистон ба Маҷлиси Олӣ самтҳои асосии сиёсати дохилию хориҷии мамлакатро барои давраҳои оянда муайян намуда, оид ба пешбурди манфиатбори сиёсати хориҷӣ ва таъмини пешрафти соҳаҳои иқтисоду саноат, энергетика, роҳу нақлиёт, амнияту мудофиа, ҳифзи ҳуқуқу тартибот, тандурустӣ, фарҳанг, илму маориф, ҳифзи иҷтимоии аҳолӣ, ҷавонон, варзиш ва сайёҳӣ вазифаҳои мушаххас гузошт.

Яке аз масъалаҳое, ки дар Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон гузошта шудааст, ин боло бурдани сатҳу сифати тарбияи наврасону ҷавонон, баланд бардоштани ҳисси худшиносии миллӣ, ватандӯстиву ватанпарастӣ ва инсонпарварии онҳо мебошад.

Моро мебояд ба ин самт таваҷҷуҳи аввалиндараҷа зоҳир намоем.
Ҳамзамон ӯ чанд сухан дар бораи муҳоҷирати бехатар ва як падидаи номатлубе, ки тамоми аҳли сайёраро бе ташвиш гузошта наметавонад, дар бораи мубориза бар зидди терроризм ва экстремизм ибрози андеша намуд.

Аз ҷумла, қайд кард, ки бинобар авҷ гирифтани гурӯҳҳои террориству экстремистӣ дар бисёр давлатҳои ҷаҳони муосир ва бархурди давлатҳои абарқудрати ҷаҳонӣ, давлату ҳукумати моро зарурат пайдо гардидааст, ки оиди ин масъала назоратро пурзур намояд.

Зеро таҷрибаи солҳои охир нишон дода истодааст, ки шомилшавии шаҳрвандони Ҷумҳурии Тоҷикистон ба ҳизбу ҳаракатҳои террористӣ баръало ба назар мерасад.

Ҳадафи асосии онҳо ҷалби шахсони бегуноҳ, аз ҷумла ҷавонон ва муҳоҷирони меҳнатӣ барои содир кардани ҷиноятҳои вазнини террористию экстремистӣ мебошад.

Инчунин барои шомил кардан ба сафҳои худ гурӯҳҳои террористию экстремистӣ кушиш менамоянд ба гурӯҳи муайяни аҳолӣ рӯ биёранд, ки онро ҷавонон, шахсони бекор муҳоҷирони меҳнатӣ, шахсони ба маблағ ниёз дошта, аз волидайн ва ҷамъият ранҷида, дорои пасти дониш ва маърифати ҳуқуқӣ бошанд.

Барои эмин нигоҳ доштан аз доми гурӯҳҳои террористию экстремистӣ ҳар як шахс, бахусус муҳоҷирони меҳнатиро зарур аст, дур аз ин гуна гурӯҳҳои ифротӣ бошанд, нагузоранд, ки ин гуна гурӯҳҳои хафнок ба оилаи онҳо ва давлату миллат ҳадафҳои нопоки худро амалӣ намоянд.

Хусусиятҳои муташаккил ва гурӯҳҳои террористию экстремистӣ дар ҷаҳон эътимод ва кӯшиши бетаъхири ба ҳам омадани давлатҳои ҷаҳонро тақозо менамояд.

Бояд зикр кард, ки чунин вохӯриҳо бо сокинон дар шаҳру ноҳияҳо, алалхусус дар Ҷамоату деҳоти вилояти Хатлон мунтазам гузаронида мешавад.

Раёсати Хадамоти муҳоҷират дар вилояти Хатлон