Вохӯриву суҳбатҳо бо муҳоҷирони меҳнатӣ дар Фурудгоҳҳои шаҳри Душанбе, Бохтар, Хуҷанд ва Кӯлоб дар мавзуи омодагӣ пеш аз сафар, пешгирии ҳодисаҳои пайвастани ҷавонон ба ҳизбу ҳаракатҳои террористию экстремистӣ, одамрабоӣ ва донистани қонунҳои нави Федератсияи Россия дар самти муҳоҷират, идома дорад.
Бояд тазаккур дод, ки вобаста ба вазъи омаду рафти муҳоҷирони меҳнатӣ-шаҳрвандони ҷумҳурӣ ба Федератсияи Россия дар фурудгоҳҳо ва истгоҳи роҳи оҳани шаҳри Душанбе корҳои фаҳмондадиҳӣ аз ҷониби гурӯҳи кории Хадамоти муҳоҷират ва зерсохторҳои он пурзур карда шудааст.
Дар рафти суҳбату вохӯриҳо бо шаҳрвандони ҷумҳурӣ, таъкид карда мешавад, ки ҳар як муҳоҷири меҳнатӣ пеш аз ҳама бояд аз қонунҳои Федератсияи Россия дар самти муҳоҷирати меҳнатӣ ҳангоми будубош ё давраи фаъолияти корӣ дар қаламрави ин кишвар огоҳ бошанд.
Инчунин, қайд гардид, ки ҳангоми сафар ҳуҷҷатҳои зарурӣ аз қабили шиносномаи тиббӣ, оиди надоштани бемориҳои сироятӣ, надоштани доғи судӣ ва ҳуҷати касбиро ҳатман бо худ гирифтан зарур аст.
Пеш аз сафар ба шуъбаю бахшҳо ва раёсатҳои Хадамоти муҳоҷират дар ҷойи зист муроҷиат намуда, бори дигар вуруди худро ба Федератсияи Россия муайян намуда, баъдан азми сафар намоед.
Ҳамзамон масъалаи дигаре, ки ташвишовар мебошад ин хатарҳои ҷаҳони муосир, аз ҷумла ба гурӯҳҳои тундрави террористию экстремистӣ пайвастани муҳоҷирон ба ҳисоб меравад, ки дар аксар маврид онҳо ба паёмакҳои телефонӣ ва ваъдаҳои бардуруғи шабакаҳои интернетӣ бовар намуда, ба доми чунин гурӯҳҳо афтида аз ватан дур монда, ҳаёти худро доғдор менамоянд.
Шаҳрвандон як чизро набояд фаромӯш кунанд, ҳангоми дар муҳоҷират будан ба доми гурӯҳҳои одамрабо низ афтодан аз эҳтимол дур нест, чунки онҳо ба ҷалби маблағҳои калон ва ҷойи кор хуб ваъда намудан, инсонҳоро қурбонии манфиатҳои худ мегардонанд.
Ба саҳми муҳоҷирон-шаҳрвандони мамлакат расонида мешавад, ки дар ҳолати дучор шудан ба чунин мушкилиҳо бояд ба Намояндагиҳои Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия ва Сафорату Консулгариҳои Ҷумҳурии Тоҷикстон дар ин кишвар, инчунини бо сохторҳои амниятии давлати Россия тариқи телефонҳои боварӣ муроҷиат намоянд.
Дар анҷоми суҳбату вохуриҳо ба саволҳои сершумори муҳоҷирон ҷавобҳои қаноатбахш дода шуда, ба онҳо маводҳои таблиғоти ва буклетҳои роҳнамоӣ ҳангоми сафар, оиди:
Тундгаро, экстремист ва террорист киҳоянд ва чаро онро бояд донист? Дар кадом ҳолатҳо шахс ба ҷавобгарӣ кашида мешавад.? тақсим гардида, ба нафароне, ки аз сафар баргаштанд барои дарёфти кори муносиб бо маоши арзанда ба ширкатҳои азими ватанӣ тавсияҳои муфид дода шуд.
Маркази матбуоти Хадамоти муҳоҷират
