Дар шароити имрӯзаи ҷаҳони муосир, ки илм ва техника босуръат рушд мекунад, имкониятҳои иттилоотӣ васеъ мешаванд ва равандҳои ҷаҳонишавӣ авҷ мегиранд, баробари ин, таҳдидҳои нав ба амнияти ҷомеа ва давлатҳо низ зуҳур мекунанд. Яке аз чунин таҳдидҳои воқеӣ ва хатарнок экстремизм ва терроризм мебошад. Ин зуҳуроти номатлуб дар даҳсолаҳои охир ба яке аз мушкилоти муҳим ва ҳалталаби ҷомеаи ҷаҳонӣ мубаддал гаштааст.

Дар ҷаҳони муосир сабабҳои паҳншавии экстремизм ва терроризм гуногунанд. Аз як тараф, ин метавонад бо мушкилоти иҷтимоӣ ва иқтисодӣ, ба монанди сатҳи пасти зиндагӣ, бекорӣ, вобаста бошад. Аз тарафи дигар, надоштани маълумоти дуруст, заминаи асосӣ барои таъсирпазирии ҷавонон аз ақидаҳои ифротгаро мегардад.

Ҳамчунин, наметавон таъсири манфии шабакаҳои иҷтимоиро нодида гирифт. Имрӯз интернет ба воситаи асосии паҳн кардани таблиғоти ифротгароёна ва ҷалби одамон ба гурӯҳҳои террористӣ табдил ёфтааст.Бо истифода аз шабакаҳои иҷтимоӣ, видеоҳо, форумҳо ва гурӯҳҳои пӯшида, идеологияи тундравона паҳн шуда, ба равони одамон таъсири манфӣ мерасонад.

Оқибатҳои терроризм ва экстремизм фоҷиабор мебошанд. Дар натиҷаи амалҳои террористӣ одамони бегуноҳ ҷони худро аз даст медиҳанд, амнияти миллӣ ва байналмилалӣ халалдор мешавад, эътимоди байни қавмҳо ва динҳо аз байн меравад ва таассубу душманӣ бештар мегардад.

Мубориза бо экстремизм ва терроризм як раванди доимӣ ва фарогир мебошад. Танҳо бо роҳи ҳамкории зичи байни давлат ва ҷомеа, бо баланд бардоштани сатҳи маърифатнокӣ ва таҳкими арзишҳои инсонӣ ва ахлоқӣ метавон бо ин вабои аср муқовимат кард.

Гулмаҳмадзода Шамшод,

Сармутахассиси Раёсати Хадамоти муҳоҷират дар шаҳри Душанбе