Бо ибтикори МД “Марказҳои машваратӣ ва омодагии пеш аз сафари муҳоҷирони меҳнатӣ”- и Хадамоти муҳоҷират дар шаҳри Душанбе бо мақсади баланд бардоштани маърифати ҳуқуқии шаҳрвандон ва пешгирии ҳуқуқвайронкуниҳо, аз ҷониби кормандони масъули марказ бо шаҳрвандоне, ки курсҳои кутоҳмуддати омӯзиши забони русиро хатм намуданд ва азми сафари кишвари Россия доранд, корҳои фаҳмондадиҳӣ гузаронида шуд.

Дар ҷараёни вохӯрӣ масъалаҳои марбут ба муҳоҷирати қонунӣ ва бехатар, аз ҷумла тағйиру иловаҳои нав дар қонунгузории муҳоҷирати Федератсияи Россия, қоидаҳои будубош дар ин кишвар, бастани шартномаҳои меҳнатӣ ва риояи кардани қоидаҳои бехатарии меҳнатӣ баррасӣ гардиданд.

Аз ҷумла, ҷорӣ шудани реҷаи нави хориҷкунӣ (режим высылки), маҳдудиятҳои нав дар будубош (қоидаи 90 рӯз дар як сол), супоридани ҳатмии биометрия ва маҳдудиятҳои корӣ дар соҳаҳои таксиву хизматрасонӣ ба таври муфассал шарҳ дода шуданд.

Инчунин, оид ба фарҳанги либоспушӣ ва рафтор сухан гуфта, қайд карданд, ки худдорӣ аз либосҳои варзишии кушод ва либоси корӣ берун аз маҳалли кор ва озода нигоҳ доштани намуди зоҳирӣ таъкид карда шуд.

Ҳамзамон, иштирокдорон таъкид карда шуданд, ки сафари худро пешакӣ ба нақша гирифта, пеш аз парвоз ҳатман аз замимаи «Госуслуги RuID» барои гузаштан аз бақайдгирии рақамӣ ва пешниҳоди ариза барои сафар ба Россия истифода намоянд. Ба таваҷҷуҳ мерасонем, ки аз 1 июли соли 2026 истифодаи замимаи «Госуслуги RuID» барои бақайдгирии пешакии рақамӣ ҳангоми ворид шудан ба Россия барои шаҳрвандони кишварҳои дорои низоми бераводид ҳатмӣ мегардад. Аз ин рӯ, муҳим аст, ки истифодаи ин хизматрасониро аз ҳозир оғоз намоед, то ҳангоми убури сарҳад аз мушкилоти эҳтимолӣ пешгирӣ карда шавад.

Шаҳрвандони муҳтарам, дар хотир нигоҳ доред, ки иҷрои саривақтии ин тадбирҳо кафили будубоши бехатар ва қонунии шумо дар қаламрави Россия ва инчунин амалӣ гардидани ҳадафҳои сафари шумо, аз ҷумла муҳоҷирати меҳнатӣ, мебошад.

Маркази матбуоти Хадамоти муҳоҷират