Бо ибтикори бахши Хадамоти муҳоҷират дар ноҳияи Ашт дар якҷоягӣ бо бахши Сабти асноди ҳолатҳои шаҳрвандии ноҳия дар Ҷамоати деҳоти Шодоба деҳаи Гулшан ҳангоми сафари шаҳрвандони ҷумҳурӣ тавассути нақлиёт ба самти шаҳри Перми кишвари Россия вохӯрии самимӣ бо муҳоҷирони меҳнатӣ баргузор карда шуд.
Дар рафти вохӯрӣ мудири бахши Хадамоти муҳорҷират дар ноҳия доир ба масъалаҳои мубрами рӯз, муҳтавои Паёми Пешвои миллат, тағйироту иловаҳо дар қонунгузории Федератсияи Россия дар самти муҳоҷират, омодагӣ пеш аз сафар, инчунин доир ба пешгирии шомилшавии ҷавонон, бахусус муҳоҷирони меҳнатӣ, муқовимат ба савдои одамон, одамрабоӣ суҳбат баргузор намуда ба шаҳрвандон варақаҳои иттилоотӣ тақсим карда шуд.
Қайд карда шуд, ки ҳар як муҳоҷир ё оилаи муҳоҷирони меҳнатӣ, ки ба хориҷа сафар доранд, бояд пеш аз ҳама аз қонунгузорӣ, урфу одат ва маданияти давлати қабулкунанда огоҳ бошанд, зеро аз сабаби паст будани сатҳи дониши ҳуқуқӣ ва беэҳтиётӣ ҳангоми муҳоҷирати меҳнатӣ метавонад сабаби пайдоиши як қатор мушкилиҳо гардад ба монанди: афтодан ба доми фиреб ҳангоми гирифтани ҳуҷҷатҳо, афтодан ба ғуломии меҳнатӣ ва шаҳвонӣ, фирефта шудан аз ҷониби гурӯҳҳои ифротгаро, пурра ё қисман гирифта натавонистани ҳақи меҳнати худ, гирифтор шудан ба зуроварии равонӣ ё ҷисмонӣ, зуран гирифтани ҳуҷҷатҳои муҳоҷирон ва маҳдуд кардани озодии муҳоҷир аз ҷониби корфармоён ё шахсони дигар оварда мерасонад.
Инчунин, оид ба муҳлати қонунигардонии будубош ва тарзи ба расмиятдарории ҳуҷҷатҳои шахсоне, ки дар феҳристи назоратшавнда қарор доранд, фаҳмонида шуд.
Сипас мудири бахши Сабти асноди шаҳрвандии ноҳия Тахмина Маҳмудзода дар баромади худ, оид ба тарзи дуруст ба расмиятдарории ҳуҷҷатҳои сабти асноди шаҳрвандӣ ва дигар ҳуҷҷатҳои ба он монанд маърӯза намуда, инчунин иброз дошт, ки бунёди ҷомеа аз оила сарчашма мегирад, оилаи солим як омили муҳими пойдории давлат аст. Маҳз фарзандони соҳибмаълумот, бо маърифат, оқилу зирак ба қадри падару модар, миллат ва Ватани азизамон расида, номбардори сазовор мегарданд. Дар Конститутсия омадааст, ки оила асоси ҷомеа буда, таҳти ҳимояи давлат қарор дорад. Бунёди оила масъулият ва муносибати ҷиддиро тақозо менамояд. Оила макони тарбияи камолоти маънавию ҷисмонии шахс ба ҳисоб меравад. Тарбияи фарзанди солим, ватандӯсту ватандор, бонангу номус вазифаи муҳим ва муқаддаси ҳар як оила мебошад.
Чӣ тавре , Ҷаноби Олӣ, Пешвои муаззами миллат мегуянд; “Ҳар як мамлакатро танҳо фарзандони баору номус, худогоҳу худшинос ва донишманду соҳибмаърифат обод карда метавонад. Аз ин лиҳоз, рисолати падару модар ва оила дар рушди миллат ва пешрафти давлат хеле бузург аст”. Имрӯзҳо, дар ин марҳилаҳои хеле ҳассос ва мураккаби таърихӣ инсоният нисбат ба тамоми давраҳои дигар ба илму маърифат, ҳифзи арзишҳои волои фарҳангиву ахлоқӣ, тамаддуни миллиамон ниёз дорад.
Чунин вохӯрии самимӣ аз ҷониби кормандони бахши Хадамоти муҳоҷират дар “Фурудгоҳи байналмилалии Хуҷанд” баргузор гардид.
Раёсати Хадамоти муҳоҷират дар вилояти Суғд
