Ҷумҳурии Тоҷикистон аз рӯзҳои аввали ба даст овардани Истиқлолияти давлатӣ мубориза бо коррупсияро ҳамчун самти афзалиятноки сиёсати худ қарор додааст. Зикр намудан бамаврид аст, ки бо шарофати Истиқлолияти давлатӣ ва сиёсати хирадмандонаи Асосгузори сулҳу ваҳдати миллӣ–Пешвои муаззами миллат муҳтарам Эмомалӣ Раҳмон алҳол Ҷумҳурии Тоҷикистон вобаста ба такмили қонунгузорӣ дар ин самт иқдоми зиёдеро амалӣ намуда истодааст.

Ҳамчунин, дар даврони соҳибистиқлолӣ ду стратегияи миллии муқовимат бо коррупсия қабул карда шуд.

Мавҷуд будани ин санадҳо сиёсати давлатии зиддикоррупсиониро таҳким бахшида, боиси эътирофи ҷомеаи ҷаҳонӣ гардидааст.

Дар ҳақиқат коррупсия зуҳуроти номатлубест, ки эътимоди мардумро ба давлат ва мақомоти давлатӣ коста гардонида, барои рушди соҳаҳои ҳаёти ҷомеа монеа эҷод мекунад.

Аз ин рӯ, мубориза, муқовимат бо ин зуҳуроти номатлуб ва пешгирӣ аз омилҳои ба он мусоидаткунанда сол то сол пурзӯр шуда истодааст.

Новобаста аз он, ки дар мамлакат ниҳоди махсуси мубориза бо коррупсия, яъне Агентии назорати давлатии молиявӣ ва мубориза бо коррупсия дар самти муқовимат бо коррупсия фаъолияти назаррас дорад, набояд дигар қишрҳои ҷомеа дар самти мубориза бо он бетараф бошанд.

Тавре Пешвои муаззами миллат муҳтарам Эмомалӣ Раҳмон таъкид намуданд: «Мубориза бо коррупсия танҳо вазифаи мақомоти ҳифзи ҳуқуқ нест.

Дар ин мубориза тамоми ҷомеа бояд бетараф набошанд.

Танҳо дар ҳамин ҳолат мо метавонем, сатҳи коррупсияро дар мамлакат коҳиш диҳем».

Бинобар ин ҳар як фарди ҷомеаро зарур аст, ки дар асоси таъкидҳои Президенти мамлакатамон амал намуда, дар ин самт беш аз пеш фаъолтар бошем.

Раёсати Хадамоти муҳоҷират дар шаҳри Душанбе