Ҷаҳони муосир, мутаассифона мубтало ба вабои терроризму экстремизм, қочоқу истифода маводи мухаддир, паҳншавии бемориҳои сироятӣ дар заминаи тарбияи нокомили ҷавонон ва амсоли чунин падидаҳои номатлуб гардидааст.
Маҳз барои ҳамин имрӯз муборизаи бемон ва муштарак бар зидди ин оризаҳо ба яке аз самтҳои афзалиятнок дар сиёсати байналхалқӣ табдил ёфтааст.
Ин масьалаи муҳим дар Паёми Президенти Ҷумҳурии Тоҷикистон муҳтарам Эмомалӣ Рахмон ба Маҷлиси Олии мамлакат возеҳу равшан омадааст: “Шиддати ин хатару таҳдидҳои ҷаҳонӣ, мутаассифона, имрӯз ҳам паст нашудааст.
Бинобар ин, мақомоти ҳифзи ҳуқуқ ва сохторҳои низомиро зарур аст, ки бо ҳушёриву зиракии сиёсӣ ва баланд бардоштани донишу малакаи касбӣ, инчунин бо истифода аз шаклу усулҳои муосир муборизаро бар зидди терроризм ва экстремизм, зуҳуроти ҷинояткории муташаккили фаромиллӣ, қочоқу муомилоти ғайриқонунии маводи мухаддир ва дигар қонуншиканиҳо тақвият диҳанд.
Дар ин раванд диққати асосӣ бояд ба пеширӣ намудани терроризму экстремизм, шомилшавии шаҳрвандони мамлакат ба созмону ҳаракатҳои террористиву экстремистӣ ва ба Ватан баргардонидани шахсони гумроҳшуда равона карда шавад”.
Ҷумҳурии Тоҷикистон ҳамчун давлати ташаббускор дар ҳалли масоили глобалӣ, аз ҷумла дар мубориза бар зидди терроризму экстремизм дар сатҳи ҷаҳонӣ пешоҳанг буда, ҷиҳати амали кардани муборизаҳои муштарак бо ин зуҳуроти харобиовар тадбирҳои мушаххаси муфид меандешад ва имрӯз дар кишвар тамоми заминаҳои ҳуқуқии муқовимат бо ин падидаҳои хатарзову даҳшатафкан фароҳам оварда шуда, аз аҳли ҷомеа тақозо мешавад, ки муборизаро бо ин зуҳуроти номатлуб дар якҷоягӣ бо мақомоти давлатӣ пурзур намоянд.
Амали намудани нақша чорабиниҳои «Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025», санадҳои дигари сиёсию ҳуқуқӣ дар ин самт қабулгардида аз самаранокии фаъолияти субъектҳои ба экстремизм ва терроризм муқовиматкунанда ва дар мубориза иштироккунанда, инчунин тақвияти ҳамкории онҳо бо ниҳодҳои ҷомеаи шаҳрвандӣ дар самти коҳиш додани хавфу таҳдиди терроризм вобастагии хеле зич дорад.
Аз ин рӯ, ҷавононро зарур аст, ки ҳушёру эҳтиёткор бошанд, бо истифода аз шароитҳои муҳайёгардида пайи илму дониш ва касбомӯзӣ бошанду меҳнати софдилонаву манфиатбахшро пеша кунанд, то ки дар оянда зиндагии шоиста дошта бошанд.
Гирифтори доми фиреби нотавонбинон ва душманони миллати тоҷик нагарданду баҳри ободиву шукуфоии ҷомеа саҳм гузоранд ва фарзанди шоистаи волидайн ва халқу миллати хеш бошанд.
Наботов Насим,
сармутахассиси шуъбаи муҳоҷирати меҳнатии Раёсати Хадамоти муҳоҷират дар шаҳри Душанбе
