Санаи 6 августи соли 2026 мулоқоти судманд бо иштироки муовини якуми Сардори Хадамоти муҳоҷират Шарифзода Маҳмадсалим Пир бо фаъолон, омӯзгорон ва сокинони ноҳияи Рӯдакӣ дар Коллеҷи фарҳанги ҷумҳуриявии ба номи П. Бӯйдоқов, баргузор гардид.
Дар ҷараёни мулоқот муовини якуми Сардори Хадамоти муҳоҷират доир ба моҳияти сиёсати давлат ва Ҳукумати мамлакат дар шароити ҳассоси ҷомеаи муосир, масъалаи баланд бардоштани ҳувияти насли ҷавон ва хушбин будан ба имрӯзу ояндаи кишвар, қадр кардани хизматҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ростои мустаҳкам намудани пояҳои давлатдорӣ ва соҳибистиқлолии мамлакат ибрози андеша намуда, бо мисолҳои мушаххас дар бораи дастовардҳои сиёсию иқтисодӣ дар замони соҳибистиқлолии мамлакатамон иштирокчиёнро ба тақвияти корҳои ободонию бунёдкорӣ, тарбияи дурӯсти насли ҷавон, пешгириии хурофоту бегонапарастӣ, пешгирии гароиши ҷавонон ба ҳизбу ҳаракатҳои иртиҷоӣ таблиғ намуданд.
Ҳамчунин таъкид шуд, ки дар ростои таҷлили сазовори 35-солагии Истиқлоли давлатии Ҷумҳурии Тоҷикистон, ки мардуми шарифи мо дар арафаи он қарор доранд, бояд аз ҳарвақта дида ба корҳои бунёдкорию созандагӣ, таъмиру тармими манзилҳои истиқоматӣ, роҳҳои дохилӣ, дастгирии оилаҳои ниёзманду муҳтоҷи ёрӣ ва бунёди иншоотҳои гуногун бештар таваҷҷӯҳ зоҳир намоем.
Ҳамзамон, дар баромади хеш вобаста ба масъалаҳои марбут ба муҳоҷирати қонунӣ ва бехатар, қоидаҳои будубош дар Федератсияи Россия, бастани шартномаҳои меҳнатӣ ва риояи кардани қоидаҳои бехатарии меҳнатӣ баррасӣ гардиданд. Таъкид шуд, ки шуғли расмӣ барои ҳифзи ҳуқуқ ва манфиатҳои муҳоҷирон аҳамияти хоса дорад.
Инчунин, доир бо вакансияҳои ҷойи кории холӣ таъмин намудани шаҳрвандони ба Ватан бозгашта дар дохили кишвар, ба касбомӯзӣ ва забономӯзӣ ҷалб намудани онҳо дар муассисаҳои таълимии Вазорати меҳнат, муҳоҷират ва шуғли аҳолии Ҷумҳурии Тоҷикистон, маслиҳатҳои муфид доданд.
Ҳозирин ҳамчунин дар бораи таҳдидҳо вобаста ба ҷалби муҳоҷирон ба гурӯҳҳои радикалӣ, террористӣ ва ҷиноятӣ огоҳонида шуданд. Қайд шуд, ки зарур аст ҷавонон бештар ба таҳсил дар мактабҳо, коллеҷҳо ва донишкадаҳо ҷалб карда шаванд.
Илова бар ин, таваҷҷуҳи ҳозирин ба масъалаҳои тандурустӣ ҷалб карда шуд. Аз ҷумла, маълумот дар бораи бемориҳои вирусӣ, махсусан ВИЧ/СПИД ва сил пешниҳод гардид. Таъкид шуд, ки риояи меъёрҳои беҳдоштӣ ва нигоҳубини саломатӣ омили муҳими пешгирии ин бемориҳо мебошад.
Вохӯрӣ дар руҳияи дӯстӣ ва ҳамдигарфаҳмӣ баргузор гардид. Дар анҷом, ба як зумра фаъолон ифтихорномаи Хадамоти муҳоҷират тақдим гардид.
Маркази матбуоти Хадамоти муҳоҷират
