Дар асоси супориши Дастгоҳи иҷроияи Президенти Ҷумҳурии Тоҷикистон тибқи нақшаи тасдиқгардида гурӯҳи муштараки тарғиботӣ Мақомоти иҷроияи ҳокимияти давлатии ноҳияи Қубодиён мулоқоту вохӯриҳои саривақтӣ бо сокинони деҳаи Саридижи ҷамоати деҳоти Қайқубоди ноҳия баргузор гардид.
Зимни суханронӣ баромадкунандагон оид ба масъалаҳои мубрами рӯз, аз ҷумла пешгирии хурофотпарастӣ, шомилшавии ҷавонон ба гурӯҳҳои ифротгаро, падидаҳои номатлуби иҷтимоӣ, бегонапарастӣ, муҳоҷирати бехатар, қонунҳои нави кишвари Россия дар самти муҳоҷират ва истифодаи самараноки нерӯи барқро мавриди таҳлилу баррасӣ қарор доданд.
Нахуст, ба иштирокдорон тағйиротҳои ба меъёрҳои Кодекси ҳуқуқвайронкунии маъмурии Ҷумҳурии Тоҷикистон ва Кодекси ҷиноятии Ҷумҳурии Тоҷикистон оид ба оқибатҳои ҳуқуқии истифодаи ғайриқонунии неруи барқро шарҳу тавзеҳ дода, қайд карданд, ки тибқи муқаррароти моддаи 382 Кодекси ҳуқуқвайронкунии маъмурии Ҷумҳурии Тоҷикистон барои истифодаи қувваи барқ ва гармӣ худсарона пайваст шудан (насб шудан) ба шабакаҳо ва дастгоҳҳои таъминоти баҳисобгирӣ ё бе шартнома бо ташкилотҳои таъминоти қувваи барқ ва гармӣ, кандан ва шикастани пломбаҳои муқарраршудаи асбобҳои андозагирӣ, инчунин аз берун дахолат намудан ба таҷҳизоти ҳисоби барқӣ ва тағйир додани нишондоди он бо мақсади насупоридани маблағи истифодаи қувваи барқ, ҳангоми набудани таркиби ҷиноят, – ба шахсони воқеӣ аз бист то сӣ, ба шахсони мансабдор аз сӣ то панҷоҳ ва ба шахсони ҳуқуқӣ аз дусад то сесад нишондиҳанда барои ҳисобҳо ҷарима карда мешавад.
Ҳамчунин зикр карда шуд, ки мувофиқи тағйиру иловаҳои воридшуда тибқи моддаи 2531 Кодекси ҷиноятии Ҷумҳурии Тоҷикистон, минбаъд агар ҳамин кирдор дар давоми як соли пас аз татбиқи ҷазои маъмурӣ содир шуда бошад ҷавобгарии ҷиноятӣ татбиқ карда мешавад.
Қайд карда шуд, ки сарфакоронаю оқилона истифодабарии неруи барқ ва саривақт пардохт намудани маблағи истифодабурдаи барқ аз сатҳи маърифатнокии ҳар як шаҳрванд вобаста мебошад.
Намояндаи бахши хадамоти муҳоҷират дар ноҳия баромад намуда, ба таваҷҷуҳи сокинон расонид, ки шаҳрвандони хориҷие, ки ғайриқонунӣ дар қаламрави Федератсияи Россия қарор доранд, танҳо 2 моҳ барои танзими мақоми ҳуқуқии худ ё хориҷ шудан аз қаламрави Россия дар ихтиёр доранд. Дар акси ҳол, нисбати онҳо чораҳои вобаста ба ихроҷ ва манъи вуруд ба Россия дар оянда татбиқ мегарданд.
Хотиррасон менамоем, ки баъди 10 сентябри соли 2025 муҳлати амали Фармони №1126, ки ба шаҳрвандони хориҷӣ ва шахсони бешаҳрванд ҳуқуқ медиҳад, то мақоми ҳуқуқии худро танзим намоянд, ба поён мерасад. Пас аз 10 сентябри соли 2025 танзими мақоми ҳуқуқӣ ғайриимкон мегардад.
Барои ҳалли масъалаи будубоши минбаъдаи қонунии худ дар қаламрави Россия, шаҳрвандони зикршуда бояд то 10 сентябри соли ҷорӣ муроҷиат намоянд ба:
1. Ҳар як филиали ФГУП “ПВС” ВКД Россия (дар ҷои иқомати воқеӣ);
2. МБМ “Сахарово”-и (барои шаҳрвандоне, ки дар шаҳри Москва иқомат доранд);
3. Наздиктарин шуъбаи масъалаҳои муҳоҷирати мақомоти ҳудудии ВКД Россия (дар ҳолати дурии ҷуғрофӣ аз ин ташкилотҳо, дар ҳолатҳои душвор ё зарурати гирифтани машварати ҳуқуқӣ бевосита аз кормандони пулис).
Ба маълумоти сокинон расонида шуд, ки дар ҳолати пайдо шудани саволҳо дар ин самт метавонанд ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар кишвари Россия муроҷиат намоянд.”
Дар охир ба саволҳои иштирокдорон посухҳои мушаххас дода шуданд.
Раёсати Хадамоти муҳоҷират дар вилояти Хатлон
