Дар кишвари офтобии Тоҷикистони азиз зиндагӣ намуда, аз ободию осоиштагии он хеле фараҳманд ҳастам. Зеро, аз як тараф, табиати биҳиштосои ин кишвари афсонавӣ, аз тарафи дигар, бунёди биноҳои гуногуни сарбафалаккашида ба кас нерӯи тоза мебахшад. Ифтихор менамоӣ, ки фарзанди ҳамин диёр ҳастию, ҳастии ту ба пешрафти ин сарзамин сахт тавъам аст.
Бале, дар давлате зиндагӣ мекунем, ки рӯз аз рӯз ободу зебо мегардаду ояндаи дурахшон дорад. Давлати амну тозаистиқлоли мо тӯли Истиқлоли миллӣ тавонист, ба чунин дастовардҳо ноил гардаду дар вуҷуди сокинонаш умед ба ояндаи боз ҳам дурахшонро бедор созад. Мутаассифона ин пешрафту тараққиёт ва гул – гулшукуфии Тоҷикистони азиз ба баъзе нафароне, ки ободию осоиштагии миллати моро намехоҳанд, писанд нест. Ва онҳо мехоҳанд, ки бо ҳар восита ба тинҷию осоиштагии кишвари мо халал ворид созанд ва мардуми моро ба гурӯҳҳои гуногуни экстремистию террористӣ шомил намоянд.
Аз ин рӯ, имрӯз ҳар яки моро лозим аст, ки барои пешгирии ин амали номатлуб сарҷамъ фаъолият намоем. Ба тарбияи наврасону ҷавонон эътибори махсус дода, онҳоро аз гаравидан ба терроризм, экстремизм ва тундгароӣ эъмин нигоҳ дорем.
Имрӯз, ҷомеаи моро зарур аст, ки барои пешгирии омилҳои номатлуб ва воридшавии мафкураи бегона ба зеҳни мардум, тавсеаи мафкураи миллӣ, рушди иҷтимоиву сиёсии ҷумҳурӣ, таҳкими иттиҳоди неруҳои созандаи кишвар барои ҳифзи манфиатҳои миллат ва давлат, мубориза бар зидди хурофотпарастиву ифротгароӣ ва ба татбиқи давлатдории миллӣ таваҷҷуҳи бештар дошта бошад. Аз таҳдиди терроризм ҳеҷ давлат худро эмин дошта наметавонад, аз ин рӯ бояд ҳамаи давлатҳо дар мубориза бар зидди ин зуҳуроти номатлуб якҷоя мубориза баранд.
Дар замони муосир шаклҳои зиёди экстремизм муайян гардидаанд, ки ҳар яке аз онон дорои хусусияти худ мебошанд, аммо онҳоро хусусиятҳои тафриқаангезӣ, ноором кардани вазъи кишвар ва дигар ҳадафҳо бо ҳам мепайванданд. Нагузорем, ки ҳамаи онҳо ба ниятҳои нопоки худ расида, ба тарбияи ҷавонони мо халале ворид созанд.
Шерализода Носиралӣ, Мудири бахши молия ва хоҷагидорӣ Раёсати Хадамоти муҳоҷират дар шаҳри Душанбе
