Дар доираи омодагиҳо ба таҷлили бошукуҳи 35-солагии Истиқлоли давлатии Ҷумҳурии Тоҷикистон, санаи 24 июли соли 2026 бахши Хадамоти муҳоҷират дар ноҳияи Қубодиён дар ҳамбастагӣ бо Кумитаи иҷроияи Ҳизби Халқии Демократии Тоҷикистон дар ноҳия, бахшҳои кор бо ҷавонон, варзиш, занон ва оила, инчунин бо иштироки фаъолони маҳаллӣ, дар деҳаҳои Роҳи Нав-1, Роҳи Нав-2 ва Зархоки Ҷамоати деҳоти Тахти Сангин як қатор чорабиниҳои фарҳангӣ, варзишӣ ва маърифатиро баргузор намуданд.
Чорабинӣ дар доираи нақшаҳои “365 рӯзи ободонӣ, созандагӣ ва бунёдкорӣ”, “300 рӯзи созандагиву бунёдкорӣ ва масъулият барои ояндаи дурахшони Ватан” ва бахшида ба эълон гардидани соли 2026 – “Соли вусъат бахшидани корҳои ободониву созандагӣ ва тақвияту таҳкими худшиносиву худогоҳии миллӣ” баргузор гардида, ҳадафи асосии он таҳкими ҳисси ватандӯстӣ, худшиносии миллӣ, тарғиби фарҳанги миллӣ ва ҷалби сокинон ба корҳои ободонӣ буд.
Дар чорабинӣ сокинони деҳаҳо, ҷавонон, занону духтарон, собиқадорон ва фаъолони ҷомеа иштироки фаъолона намуданд. Дар мусобиқаҳои гуногуни варзишӣ наврасони мактаби варзишӣ қувваозмоӣ карданд.
Ҳамзамон, бо сокинон суҳбату вохӯриҳои судманд баргузор шуда, масъалаҳои муҳими иҷтимоӣ, аз ҷумла омодагӣ ба ҷашни Истиқлол, тарбияи ватандӯстонаи ҷавонон, пешгирии муҳоҷирати ғайриқонунӣ, баланд бардоштани маърифати ҳуқуқии шаҳрвандон, омӯзиши касбу ҳунар ва забонҳои хориҷӣ барои муҳоҷирони меҳнатӣ пеш аз сафар ба хориҷи кишвар, инчунин риояи қонунгузории давлатҳои қабулкунанда мавриди баррасӣ қарор гирифтанд. Таъкид гардид, ки муҳоҷирати меҳнатӣ бояд бо дониши кофии забон, соҳибкасбӣ ва риояи қонун амалӣ гардида, муҳоҷирон бояд ҳамчун намояндагони шоистаи миллати тоҷик обрӯи Ватанро дар хориҷи кишвар ҳифз намоянд.
Дар доираи барномаи фарҳангӣ намоиши ҳунарҳои мардумӣ, таомҳои миллии тоҷикӣ, маҳсулоти дастӣ, либосҳои миллӣ ва дигар намунаҳои фарҳанги ғании тоҷикон ташкил гардида, ҳунару маҳорати сокинон ба маърази тамошо гузошта шуд.
Зимни суханрониҳо таъкид карда шуд, ки 35 соли Истиқлолияти давлатӣ барои мардуми Тоҷикистон давраи сулҳу субот, ваҳдати миллӣ, пешрафти иқтисодиву иҷтимоӣ ва бунёдкориву созандагӣ мебошад. Имрӯз ҳар як шаҳрванди ватандӯст бояд дар ободии Ватан саҳми арзандаи худро гузорад ва арзишҳои миллӣ, фарҳангӣ ва таърихии худро ҳифз намояд.
Дар ҷараёни чорабинӣ бо ташаббуси сокинон ва фаъолони деҳаҳо дар болои як қатор хонаҳои истиқоматӣ Парчами давлатӣ насб карда шуд.
Бояд зикр намуд, ки баргузории чунин чорабиниҳои фарҳангиву маърифатӣ ва варзишӣ дар дигар деҳаҳо ва ҷамоатҳои ноҳияи Қубодиён тибқи нақшаи тасдиқгардида идома дошта, онҳо дар таҳкими ваҳдати миллӣ, боло бурдани рӯҳияи ватандӯстӣ, эҳтиром ба муқаддасоти давлатӣ ва омодагии сазовор ба таҷлили 35-солагии Истиқлоли давлатии Ҷумҳурии Тоҷикистон нақши муҳим мегузоранд.
Алимардонов Фаридун.,
Мудири бахши Хадамоти муҳоҷират дар ноҳияи Қубодиён
