Кормандони масъули Раёсати Хадамоти муҳоҷират дар вилояти Хатлон корҳои иттилоотӣ-маърифатиро дар байни шаҳрвандони ҷумҳурӣ-муҳоҷирони меҳнатӣ дар Фурудгоҳи байналмилалии шаҳри Бохтар, ки тавассути парвоз ба минтақаҳои гуногуни Федератсияи Россия ва дигар кишварҳои хориҷа сафари меҳнатӣ мекунанд, пурзӯр намуда истодаанд.

Вохӯрии навбатиро гурӯҳи кории Раёсат бо як зумра сокинони вилоят, ки азми сафари фаъолияти меҳнатӣ доранд, баргузор намуданд.

Зимни мулоқот иҷрокунандаи вазифаи сардори Раёсат Исфандиёр Сироҷов ба ҳозирин дар бораи вазъӣ кунунии шаҳрвандони Ҷумҳурӣ Тоҷикистон дар кишвари Россия қайд намуда таъкид сохт, ки айни замон вазъият дар Федератсияи Россия ором аст. Шахсоне, ки мехоҳанд фаъолияти меҳнатии худро дар ин кишвар давом диҳанд, бояд бе чуну чаро қоидаҳои будубош, қайди муваққатӣ, гирифтани патент ва қонунҳои амалкунандаи Федератсияи Россия дар самти муҳоҷирати меҳнатӣ риоя намоянд.

Вақти он расидааст, ки шаҳрвандони Ҷумҳурии Тоҷикистон дар Федератсияи Россия ва дигар давлатҳои қабулкунанда бояд аз хатарҳои шомил шудан ба ҳаргуна ҳизбу ҳаракатҳои ифротӣ худро канора гиранд. Бо шахсони ношинос ва ваъдаҳои бардурӯғи онҳо тез боварӣ ҳосил накарда, ба сохторҳои дахлдори кишвари қабулкунанда хабар диҳанд, то худро аз ин хатарҳои дар пеш меомада эмин нигоҳ доранд.

Дар рафти вохӯрӣ чанд сухан дар бораи тадбирҳои иловагӣ оид ба иҷрои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», фарогирии аҳолӣ бо касбомӯзӣ ва шуғли пурмасъул ва дигар масъалаҳои мубрами рӯз сухан гуфтанд.

Бояд тазаккур дод, ки гурӯҳи кории Раёсат ҳангоми мулоқот бо шаҳрвандони ҷумҳурӣ, дар бораи терроризм ва экстремизм иброз намуда, қайд карданд, ки имрӯзҳо дар ҷаҳони муосир гурӯҳҳои экстремистӣ ва террористие фаъолият доранд, ки ҳадафи асосии онҳо ҷалби шахсони бегуноҳ, аз ҷумла ҷавонон ва муҳоҷирони меҳнатӣ барои содир кардани ҷиноятҳои вазнини экстремистию – террористӣ мебошад.

Аз ин рӯ, ҷавонони моро зарур аст, ки ба ваъдаи даромади муфт ва зуд ҳал кардани мушкилоташон дар хориҷи кишвар ҳеҷ гоҳ бовар накунанд. Аз ҷумла, ҳангоми муҳоҷирати меҳнатӣ ба ваъдаҳои дарёфти кори муносиб ва музди меҳнати баланд пешниҳод намудани шахсони шубҳанок, ки онҳоро намешиносанд бовар накунанд ва донанд, ки шахсони бегона метавонанд ба онҳо таъсир расонида онҳоро гумроҳ намоянд ва ба созмонҳои гуногуни экстремистию – террористӣ ҷалб намоянд.

Ҳамзамон масъулин иброз доштанд, ки падару модаронро зарур аст, ки аз фаъолияти меҳнатии фарзандонашон дар хориҷи кишвар огоҳ бошанду ҳамеша бо онҳо дар тамос бошанд. Фаромӯш набояд кард, ки танҳо фарзанди боодоб ба падару модараш раҳмату офарин меорад.

Дар фарҷоми вохӯрӣ, ба муҳоҷирони меҳнатӣ, ки бештари онро сокинони вилоят ташкил медиҳад, буклетҳо оид ба: Мо бар зидди терроризм ва экстремизм (ифротгароӣ), Тундгаро, экстремист ва террорист киҳоянд ва чаро онро бояд донист? Дар кадом ҳолатҳо шахс ба ҷавобгарӣ кашида мешавад? Китобчаи кисагии муҳоҷири меҳнатӣ тақдим карда шуд.

Раёсати Хадамоти муҳоҷират дар вилояти Хатлон