Терроризм падидаи номатлубест, ки сар то сари ҷаҳонро фаро гирифтаас. Вобаста ба вазъияте, ки имрӯз дар ҷаҳон ба амал омадааст, яке аз самтҳои афзалиятноки сиёсати сарони давлатҳо ва тамоми мардуми сайёра ин мубориза бар зидди экстремизм ва терроризм мебошад.
Терроризме, ки худ нокомӣ, бадномӣ ва яъсу ноумедиро ба бор меорад.
Дар Паёми навбатии Президенти кишвар муҳтарам Эмомалӣ Раҳмон дар робита ба ин таҳдиду чолишҳо омадааст: «Тоҷикистон ҳамчун давлати соҳибихтиёр, демократӣ, ҳуқуқбунёд ва дунявию иҷтимоӣ узви ҷомеаи ҷаҳонӣ буда, дар ҷараёни таҳаввулоти босуръати ҷаҳонишавии муносибатҳои иқтисодию иҷтимоӣ ва рушди соҳаҳои гуногуни ҳаёт қарор дорад.
Бо вуҷуди чунин вазъ, дар арсаи байналмилалӣ то ҳол таърифи ягонаи мафҳумҳои “Терроризм” ва «Террорист» вуҷуд надорад, ки ин ҳолат ба истифодаи меъёрҳои дугона ва духурагиву гуногунфаҳмиҳо мусоидат карда истодааст.
Инсоният бояд ҳамеша дар назар дошта бошад, ки терроризм ва террористонро ба худӣ ва бегона, ашадӣ ва ислоҳгар ё хубу бад ҷудо кардан ба ҳеҷ ваҷҳ мумкин нест, террорист, ватан, дин, мазҳаб ва миллат надорад.
Зуҳуроти терроризм ба суботу амнияти кураи замин хавфу хатари бениҳоят зиёд дорад.
Оқибатҳои харобиоварӣ террористон боис гаштааст, ки имрӯз мардуми сайёра бар зидди ин ҳаракати номатлуб ва вабои аср, ки солҳост идома дорад дастаҷамъона мубориза мебаранд.
Ин падида солҳои охир, бахусус дар ҷаҳони ислом дар шаклҳои тезу тунд воқеъ гардида на танҳо боиси вайрон шудани амну субот ва ба вуҷудоии буҳрони иқтисодӣ дар кишварҳои ҷаҳони сеюм шудааст, ҳамчунин ба вазъи иқтисодию иҷтимоӣ ва сиёсии умуман ҷаҳони муосир таъсири бад мерасонад.
Дар ин раванд, имрӯз бахусус омили исломгароии сиёсӣ нақши бориз мебозад.
Қудратҳои ҷаҳонӣ ва минтақавӣ ба мақсади расидан ба ҳадафҳои сиёсӣ (геополитикӣ) – и худ дар ҷаҳони ислом кӯшиши зиёд ба харҷ медиҳанд, ки бо такя ба эътиқодии динии мардум аз он тафовутҳое, ки миёни фирқаву мазҳабҳои исломӣ вуҷуд дорад, суйистифода намоянд.
Барои расидан ба ин ҳадаф бар дасти худи мусулмонон ҳизбу ҳаракатҳои сиёсии хусусияти динии ғайрисунатидошта таъсис дода онҳоро байни мусулмонони кишварҳои исломӣ аз тариқи роҳҳои мухталиф интишор медиҳанд ва барои чунин амал маблағҳои пулии ҳангуфт сарф месозанд. Намунаи чунин ҳизбу ҳаракатҳо, ки имрӯз дар кишварҳои Осиёи Марказӣ аз худ дарак медиҳанд, ҳаракати Салафия, Толибон, Ҷамоати таблиғ, Ҳизби таҳрир, Ансоруллоҳ ва амсоли инҳо мебошанд.
Дар чанд соли охир бо дасти чунин ҳизбу ҳаракатҳо қудратҳои ҷаҳонӣ ва минтақавӣ тавонистанд, ки дар Либия, Тунис, Алҷазоир, Миср, Ироқ, Сурия, Афғонистон тазоҳуротҳои сиёсӣ ба вуқуъ пайваста ин кишварҳоро аз рушди устувор на танҳо боз доранд, ҳамчунин ҷаҳони исломро ноором сохтанд.
Аз ҷумла, солҳои 90-уми асри гузашта дар Тоҷикистон аз бовару эътиқодот суйистифода карда ҳизбҳое шакл гирифтанд, ки бо худ номи дину мазҳабро дошта, дар як муддати кӯтоҳ даст ба амалиётҳои тахрибкорӣ зада ва ҷомеаи Тоҷикистонро ба гирдоби ҷанги шаҳрвандӣ кашиданд.
Қобили қайд аст, ки дар ҷанги шаҳрвандии солҳои 90-уми асри гузашта яке аз омили асосӣ ин сиёсикунонии имону эътиқод буд, ки тавассути Ҳизби наҳзати ислом роҳандозӣ шуда буд.
Ин ҳизб поягузору сармоягузори хориҷӣ дошт ва бештар барои манфиатҳои онҳо таъсис дода шуда буд. Тарсу даҳшатафкании солҳои 90-уми асри гузашта, ки аз ҷониби пайравону дастандаркорони ин ҳизб роҳандозӣ шуд ҳанӯз дар зеҳни мардум нақш бастааст.
Ҳукуматдорони Тоҷикистон дар муддати гуфтушуниди панҷсола ба натиҷаи истиқрори сулҳ ва ризоияти миллӣ расиданд ва ҷурму ҷинояти аз ҷониби ҲНИ роҳандозӣ шуда, бидуни муҷозот бахшида шуд ба ин ҳизб дубора ба фаъолият оғоз намуд, то он лаҳзае, ки боз дубора нақшаи табаддулоти ин гурӯҳ айён нагашт ва билохира ҲНИ ҳамчун ҳизби мамнуъ ва террористӣ дар кишвар эълон гашт.
Мавриди зикр аст, ки Тоҷикистон аз замони ба даст овардани истиқлолият бовару эътиқоди мазҳабиро тибқи озодии виҷдон дар доираи қанститутсия машҳурият бахшид. Бинобар ин, имрӯз дар маҷмуъ бештар аз 4000 масҷидҳои расмӣ дар саросари Тоҷикистон фаъолият доранд, ки мардумони мазҳабӣ бе мамнуният ибодати хешро баҷо меоранд.
Бояд гуфт, ки Ҷумҳурии Тоҷикистон муборизаро бар зидди терроризм ҳамчун вазифаи муҳимтарини таъмини амнияти миллии худ, минтақа ва ҷаҳон баррасӣ намуда, барои тақвияти минбаъдаи ҳамкориҳои байналмилалӣ дар ин самт талош меварзад.
Ғайбуллоев Б,
мудири бахши Хадамоти муҳоҷират дар ноҳияи Айнӣ
