Гурӯҳи кории Мақомоти иҷроияи ҳокимияти давлатии ноҳияи Файзобод, ки дар он бахши Хадамоти муҳоҷирати ноҳия шомил аст, вохӯриҳои навбатиро дар муассисаҳои таълимии рақамҳои №17,№18 ва №40-и ҷамоатҳои деҳоти Меҳробод ва Вашгирд бо омӯзгорону хонандагон ва волидайни онҳо баргузор намуданд.

Зимни суханронӣ баромадкунандагон, дар бораи тарбияи ватандӯстии ҷавонон, аз ҷумла пешгирии шомилшавии ҷавонон ба ҳизбу ҳаракатҳои террористию – экстремистӣ, муқовимат бо коррупсия, хариду фурӯши одамон, сафар ба муҳоҷирати меҳнатӣ ва бозгашт аз муҳоҷират ва дигар масъалаҳои мубрами рӯз ибрози ақида намуданд.

Мудири бахши Хадамоти муҳоҷират дар ноҳияи Файзобод Басонат Азизова дар назди ҳозирин, дар бораи муҳоҷирати меҳнатӣ, қонунҳои амалкунандаи нави Федератсияи Россия дар самти муҳоҷират, доштани Сертификат дар бораи донистани забон, фарҳанг, таърих ва қонунгузории ин кишвар, гирифтани Патент, қайди муваққатӣ, бастани шартномаи меҳнатӣ бо корфармо ва дигар масъалаҳои вобаста ба муҳоҷирати бехатар суханронӣ намуд.

Инчунин, ӯ дар дар бораи риояи Барномаи миллии ташаккули тарзи ҳаёти солим, пешгирӣ ва ташхису табобати муҳоҷиронӣ меҳнатӣ ҳангоми бозгашт аз муҳоҷират ба Ватан, ҷоннок намудани корҳои иттилоотӣ – маърифатӣ дар байни шаҳрвандон сухан гуфт.

Ҳамзамон Басонат Азизова, дар бораи мафҳуми экстремизм ва терроризм ибрози ақида намуда, қайд кард, имрӯз терроризм ва экстремизм ҳамчун вабои аср ба амнияти ҷаҳон ва ҳар сокини сайёра таҳдид карда, барои башарият хатари на кам аз силоҳи ядроиро ба миён овардааст.

Мубориза бо терроризм ва экстремизм фароҳам овардани фазои боварӣ, эҳтиром ба манфиатҳои ҳамдигар ва муттаҳид шудани ҳамаи кишварҳои дунёро дар пешорӯи ин хатари умумӣ тақозо менамояд.

Зуҳуроти даҳшатноку нафратовари терроризм, ки аксаран таҳти шиорҳои диниву мазҳабӣ сурат мегирад, ба дини мубини Ислом иртиботе надорад, баръакс, аз ҷониби душманони ин дини муқаддас роҳандозӣ шуда, ки аз ин ваҳшонияти асримиёнагӣ, пеш аз ҳама, кишварҳои исломӣ ва мусулмонони сайёра зарар мебинанд.

Боиси таассуф аст, ки баъзе созмонҳои байналмилалӣ аз ҷониби як қатор доираҳо ва давлатҳову фондҳо ошкоро маблағгузорӣ гардидани созмонҳои террористиву ифротгаро, поймолшавии ҳуқуқи инсон, аҳволи тоқатфарсо ва дар роҳи муҳоҷират дар баҳрҳо ғарқ шудани ҳазорон нафар гурезаҳо, аз ҷумла занону кӯдаконро нодида мегиранд.

Аз ин лиҳоз, метавон гуфт, ки бар асари истифодаи қувва ва зӯрӣ дар равобити байналмилалӣ, дар ҳифзи манфиатҳои хеш рӯ ба рӯ омадани қудратҳои ҷаҳонӣ ва минтақавӣ, зери фишори неруву унсурҳои бегона амалан аз байн рафтани низоми давлатдории як силсила кишварҳо ва вусъати торафт афзояндаи терроризму – экстремизм вазъи ҳуқуқи байналмилалӣ хеле заиф шуда, истиқлолияти давлатҳои миллӣ осебпазир гардидааст.

Дар доираи тақвияти мубориза бо терроризм ва экстремизм бояд номгӯи субъектҳои бо онҳо муборизабаранда васеъ ва дақиқ гардида, дар баробари ин ҷавобгарӣ ва ҷазо барои содир намудани ҷиноятҳо ба муқобили сохти конститутсионӣ ва амнияти давлат, ҷиноятҳои хусусияти террористиву экстремистидошта ва хиёнат ба Ватан, шарикӣ дар чунин ҷиноятҳо, аз ҷумла, нисбат ба ташкилкунандагон ва шахсони ба онҳо мусоидаткунанда пурзӯр карда шавад.

Яке аз воситаҳои ба гурӯҳҳои ифротгароӣ, аз ҷумла, терроризм ва экстремизм шомил шудани ҷавонон дар давраи муосир ин тавассути шабакаи интернет ба психологияи онҳо таъсир расонидани ин гурӯҳҳо мебошад.

Ин аст, ки имрӯз марзи давлатии Тоҷикистон марзи устуворӣ, марзи осудагӣ ва суботу амнияти ниме аз ҷаҳон мебошад ва ҳамаи ин дастовардҳоро бояд ҳар як фарди бонангу номуси Тоҷикистон ҳифз намояд ва дар мубориза алайҳи хатарҳои глобалии ҷаҳонӣ саҳм гузорад.

Тибқи нақша баргузории суҳбату вохӯриҳо дар муассисаҳои таълимии ноҳия бо маром идома дорад.

Бахши Хадамоти муҳоҷират дар ноҳияи Файзобод.