Бо ибтикори бахши Хадамоти муҳоҷират дар ноҳияи Темурмалик вохӯрии навбатӣ бо сокинони деҳаи Руҳафзо Ҷамоати деҳоти Гурдоварон баргузор гардид, ки дар он зарурати муносибати масъулона ва пешакӣ омодашуда ба муҳоҷирати меҳнатӣ, баррасӣ гардид.
Дар ҷараёни вохӯрӣ мудири бахши Хадамоти муҳоҷират дар ноҳия Сафарзода Баҳодур қайд намуд, ки тибқи манбаъҳои расмии кишвари Россия, аз соли 2027 дар Федератсияи Россия лоиҳаҳое таҳия мегарданд, ки ба ҷорӣ намудани низоми ҷалби муташаккилонаи кормандони хориҷӣ равона шудаанд. Ин ташаббусҳо пурзӯр намудани назорат бар равандҳои муҳоҷирати меҳнатӣ, баланд бардоштани талабот ба сатҳи тахассуси кормандон ва рушди механизмҳои мутамаркази интихоб ва ҷалби кадрҳоро пешбинӣ менамоянд.
Дар чунин шароит Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон тавсия медиҳад: омӯзиши асосҳои қонунгузории муҳоҷиратӣ ва меҳнатии Федератсияи Россия; гирифтани дониши ибтидоии забони русӣ; шиносоӣ бо ҳуқуқ ва уҳдадориҳои кормандони хориҷӣ; омодагӣ барои шуғли расмӣ. Пешакӣ омода намудани тамоми ҳуҷҷатҳои зарурӣ, аз ҷумла:
шиносномаи хориҷӣ; ҳуҷҷатҳои тасдиқкунандаи тахассус.
Махсус таъкид карда мешавад, ки зарур аст аз имкониятҳои
Муассисаи давлатии “Маркази рушди ҳунармандӣ ва малакаҳои касбии муосир” истифода бурда шавад, ки пешниҳод менамояд: омӯзиши касбӣ аз рӯи ихтисосҳои талаботнок; курсҳои мутобиқшавӣ барои кор дар хориҷ; машваратҳо оид ба шуғли қонунии меҳнатӣ. Дар шароити пурзӯр гардидани талабот нисбат ба кормандони хориҷӣ ва гузариш ба шаклҳои муташаккилонаи ҷалби қувваи корӣ, набудани омодагӣ ва малакаҳои зарурӣ метавонад монеа барои шуғл дар Федератсияи Россия гардад.
Омодагии пешакӣ дар ҳудуди Ҷумҳурии Тоҷикистон имконият медиҳад: баланд бардоштани сатҳи тахассус; таъмин намудани шуғли қонунии меҳнатӣ; кам намудани хавфи вайрон кардани қонунгузории муҳоҷиратӣ; ҳифзи ҳуқуқҳои меҳнатӣ.
Хадамоти муҳоҷират сокинони ноҳияи Темрмаликро даъват менамояд, ки ба муҳоҷирати меҳнатӣ бо масъулият муносибат намуда, аз ҳамаи имкониятҳои давлатӣ барои омодагӣ ва омӯзиш истифода баранд ва қонунгузории кишвари қабулкунандаро қатъиян риоя намоянд. Танҳо омодагии ҳамаҷонибаи пеш аз сафар кафолати фаъолияти бехатар, қонунӣ ва муваффақонаи меҳнатӣ дар хориҷи кишвар мебошад.
Маркази матбуоти Хадамоти муҳоҷират
