Вохӯрии навбатӣ бахшида ба 35-солагии Истиқлоли давлатии Ҷумҳурии Тоҷикистон бо сокинони деҳаи Сафарбоён Ҷамоати деҳоти Кангурти ноҳияи Темурмалик баргузор гардид.
Зимни чорабинӣ таъкид гардид, ки Истиқлоли давлатӣ барои мардуми Тоҷикистон неъмати бузург ва заминаи асосии рушди давлатдорӣ, таҳкими ваҳдати миллӣ, суботи сиёсӣ ва пешрафти соҳаҳои гуногуни ҳаёти ҷомеа мебошад. Дар зарфи 35 соли соҳибистиқлолӣ бо татбиқи сиёсати созанда ва дурнамои рушди миллӣ барои пешрафти иқтисодиву иҷтимоӣ, фарҳангӣ ва илмӣ шароити мусоид фароҳам оварда шудааст.
Ҳамзамон, иброз гардид, ки ҳифзи дастовардҳои даврони соҳибистиқлолӣ, арҷ гузоштан ба арзишҳои миллӣ, баланд бардоштани ҳисси ватандӯстӣ ва иштироки фаъол дар корҳои ҷамъиятӣ аз ҷумлаи вазифаҳои муҳими ҳар як шаҳрванди кишвар ба ҳисоб меравад.
Дар идомаи чорабинӣ иштирокчиён оид ба дастовардҳои даврони истиқлол, нақши ҷавонон дар рушди ҷомеа, тарғиби фарҳанги миллӣ ва масъулияти шаҳрвандӣ андешаронӣ намуда, таъкид карданд, ки истиқболи сазовор аз 35-солагии Истиқлоли давлатӣ бояд бо корҳои созанда, эҳсоси баланди ватандӯстӣ ва саҳми муносиб дар ободии Ватан сурат гирад.
Инчунин, дар рафти вохӯрӣ мудири бахши Хадамоти муҳоҷират дар ноҳия Сафарзода Баҳодур оид ба мушкилиҳое, ки имрӯз дар раванди муҳоҷират муҳоҷирони меҳнатӣ дучор мешаванд ва чи тавр аз ин омилҳо эмин нигоҳ доштани худ суханронӣ намуда, оиди қонунҳои амлкунандаи Федератсияи Россия дар самти муҳоҷират ба њозирин маълумот доданд.
Аз ҷумла, қайд карданд, ки аз 1 январи соли 2025 Фармони Президенти Федератсияи Россия №1126 аз 30 декабри соли 2024 “Дар бораи чораҳои муваққатӣ оид ба танзими мақоми ҳуқуқии категорияи алоҳидаи шаҳрвандони хориҷӣ ва шахсони бешаҳрвандӣ” ба қувваи қонунӣ даромад.
Тибқи ин фармон, шаҳрвандони мо, ки ғайрирасмӣ дар ҳудуди Федератсияи Россия қарор доранд, бояд ё қаламрави ФР-ро тарк намоянд ва ё мақоми ҳуқуқии худро қонунӣ гардонанд.
Чорабинӣ дар фазои баланди сиёсиву фарҳангӣ баргузор гардида, иштирокчиён таъкид намуданд, ки Истиқлоли давлатӣ ҳамчун муқаддастарин дастоварди миллӣ бояд ҳифз ва таҳким бахшида шавад.
Маркази матбуоти Хадамоти муҳоҷират
