Кормандони шуъбаи Хадамоти муҳоҷират дар ноҳияи Спитамен дар маҳаллаи Каримов бо мақсади тақвият бахшидани корҳои иттилоотию фаҳмондадиҳӣ миёни аҳолӣ ва баланд бардоштани сатҳи омодагии шаҳрвандон — муҳоҷирони меҳнатӣ пеш аз сафар чорабинии навбатӣ баргузор намуданд.

Дар доираи чорабинӣ аз ҷониби намяондаи шуъба Сарбозорова О., оид ба тарзи ҳаёти солим суҳбат гузаронида шуда, ба сокинон оид ба аҳамияти нигоҳдории саломатӣ, риояи қоидаҳои беҳдоштӣ, пешгирии бемориҳои сироятӣ, ғизои дуруст ва пешбурди зиндагии фаъол маълумот дода шуд.

Ҳамзамон, дар рафти вохӯрӣ ба сокинон маълумоти зарурӣ оид ба тағйиру иловаҳои қонунгузории марбутаи Федератсияи Россия расонида шуд. Мутахассисон қоидаҳои будубош, тартиби бақайдгирӣ ва ҳуҷҷатгузорӣ, аз ҷумла гирифтани патент, супоридани имтиҳон аз забони русӣ, таърих, тамаддун ва қонунгузории кишвар, доштани касби мувофиқ ва ҳуҷҷатҳои тасдиқкунандаро шарҳ доданд. Ҳамчунин аҳамияти бастани шартномаи меҳнатӣ низ таъкид гардид.

Кормандони шуъба зарурияти вуруд ба кишвари қабулкунанда танҳо бо шиносномаи хориҷӣ, риояи қоидаҳои муҳоҷиратӣ ва худдорӣ аз ҳамкорӣ бо гурӯҳҳои ифротгароёнаро хотиррасон карданд. Бо ҳадафи пешгирӣ аз ҳолатҳои фиребхӯрӣ, масъалаҳои муқовимат ба савдои одамон ва роҳҳои ҳимояи шаҳрвандон аз ин зуҳуроти хатарнок низ тавзеҳ дода шуд.

Ба иштирокчиён дастурамалҳои мухтасар ва маводи иттилоотию фаҳмондадиҳӣ тақдим гардида, зикр шуд, ки надонистани забон, қоидаҳои будубош ва набудани касбу ҳунар аксаран боиси мушкилиҳо мегардад ва метавонад сабаби ихроҷи муҳоҷирон аз қаламрави Федератсияи Россия шавад.

Дар анҷоми чорабинӣ шаҳрвандон барои риояи эҳтиёткорӣ дар кишвари бегона, ҳифзи арзишҳои миллӣ, пешбурди тарзи ҳаёти солим ва иҷрои қоидаҳои муҳоҷирати меҳнатӣ ҳидоят карда шуданд.

Маркази матбуоти Хадамоти муҳоҷират