Ифтихор кардан аз Истиқлолияту озодӣ ва гиромидошти он вазифа ва қарзи шаҳрвандии ҳар кадом ватандор аст. Ҳоло ба ҳамаи мо маълум аст, ки имрӯзҳо дар кишварҳои ҳамсоя ва бархе манотиқи олам чӣ гуна нобасомонию нотинҷӣ ва азобу уқубати мардуми бечора ба амал омада истодааст.
Мо бояд шукргузори чунин Ватани обод бошем, ки дар зиндагӣ моро ин саодат насиб гаштаву сарбаланд гардонидааст. Шукрона аз Сарвари оқилу хирадпеша ва ояндасоз кунем, ки болои сари мост ва моро аз ҳар гуна омилҳои таҳдидомези сиёсӣ ҳифз мекунанд ва пайваста дар фикри оромиву озодии мардум ҳастанд. Шукрона, ки имрӯз Тоҷикистони мо дар айёми гул – гул шукуфтанҳост ва рӯз аз рӯз нуфузи худро дар арсаи байналмилал баланд гардонида истодааст. Ҳамаи ин дастовардҳо маҳз бо шарофати роҳбарияти ғамхору хирадманди кишвар ва мардуми ваҳдатофар ба даст омадааст. Вазифаи мост, ки ба ояндагон, ба насли фардо чунин шоистагию зафармандиро бо корнамоиҳои нек ба мерос гузоранд, то ояндагон моро ватандору ватандӯст шинохта аз гузаштагони хеш ифтихор намоянд.
Мутаассифона, амалҳои ифротиву ақидаҳои террористиву экстремистӣ имрӯз тамоми оламро муташанниҷ гардонида, вазъи ороми халқиятҳоро барҳам дода истодааст. Мусаллам аст, ки замони муосир барои кулли мардуми рӯи олам ҳодисаву воқеаҳои гушношуниду манзараҳои ҳузнангезеро рӯ ба рӯ сохт. Зеро аксарияти кишварҳои дунё имрӯз муртакиби амалҳои ваҳшиёнаи гурӯҳҳои ифротӣ гардидаанд. Боиси таассуф аст, ки ташкилотҳои террористиву экстремистӣ авҷ гирифта, сабаби бадбахтиҳои зиёде гардидааст. Тарафи манфии кор дар он аст, ки мардум имрӯз аз сабаби надоштани саводи комили динӣ ба гурӯҳҳои ифротгароӣ шомил гардида, ҳаёти хеш ва атрофиёнашонро барбод медиҳанд, зеро охири амали ҳар аъзои ташкилоти ифротӣ пушаймонӣ асту бас.
Ҳаёти осоишта – неъмати бебаҳо аст, зеро он шарт ва тақозои асосии ҳаёти инсон ба ҳисоб меравад. Ҳар нафари соҳибақлу зиндадил кӯшиш ба зиндагии осуда мекунад, зеро тинҷиву оромӣ гарави ҷомаи амал кӯшидани тамоми орзуву мақсадҳои башарӣ аст. Баҳри пешгирӣ ва рахнаи амалиёти террористӣ ва экстремистӣ олимон, мутахассисони соҳа, сиёсатмадорону тадбирандешон якҷоя дар пайвастагӣ фаъолият мебаранд, то ки ин зуҳуроти номатлубро решакан кунанд.
Аз ин ҷиҳат, сарчашмаи ҳамаи нооромиву нокомиҳои миллатро ҳар нафари соҳибақл аз падидаҳои хатарзо ва зуҳуроти номатлуби терроризм ва экстремизм медонад.
Борониева Сакина,
Мутахассиси пешбари шуъбаи қабул ва маслиҳатдиҳӣ Раёсати Хадамоти муҳоҷират дар шаҳри Душанбе
