Бо мақсади баланд бардоштани маърифати ҳуқуқию иҷтимоии шаҳрвандон, пешгирии омилҳои номатлуби ҷомеа, аз ҷониби кормандони шуъбаи Хадамоти муҳоҷират дар шаҳри Панҷакент дар доираи иҷрои нақшаи чорабиниҳои Раёсати Хадамоти муҳоҷират дар вилояти Суғд бо сокинони Ҷамоати деҳоти Хурмӣ вохӯрии иттилоотию маърифатӣ баргузор гардид. Дар чорабинӣ масъалаҳои муҳими марбут ба муҳоҷирати меҳнатӣ, ҳифзи ҳуқуқу манфиатҳои шаҳрвандон, риояи талаботи қонунгузории Ҷумҳурии Тоҷикистон, омодагии ҳамаҷониба пеш аз сафар ба хориҷи кишвар ва пешгирии муҳоҷирати ғайриқонунӣ фаҳмонида шуд

Зимни вохӯрӣ намояндаи шуъбаи Хадамоти муҳоҷират ба иштирокчиён оид ба зарурати баланд бардоштани сатҳи огоҳии ҳуқуқӣ, риояи қоидаҳои будубош ва фаъолияти меҳнатӣ дар давлатҳои қабулкунанда, бастани шартномаҳои меҳнатӣ, санҷидани эътимоднокии корфармо ва истифодаи роҳҳои қонунии сафару фаъолияти меҳнатӣ маълумоти муфассал пешниҳод намуд, ки огоҳии ҳуқуқӣ ва омодагии дуруст пеш аз сафар метавонад барои пешгирии ҳолатҳои фиреб, поймол гардидани ҳуқуқҳои меҳнатӣ ва дигар мушкилоти эҳтимолӣ мусоидат намояд. Ҳамзамон, ба масъалаҳои пешгирии савдои одамон (қочоқи инсон), коррупсия, экстремизм ва терроризм, нашъамандӣ ва нашъаҷаллобӣ, ҷинояткорӣ ва зӯроварӣ дар оила таваҷҷуҳи махсус зоҳир карда шуд. Иштирокчиён даъват гардиданд, ки нисбат ба зуҳуроти номатлуб бетараф набошанд, қонунҳоро риоя намоянд ва дар тарбияи насли ҷавон дар рӯҳияи ватандӯстӣ, масъулиятшиносӣ ва эҳтиром ба арзишҳои миллӣ саҳм гузоранд.

Дар идомаи чорабинӣ масъалаи рушди касбу ҳунар, аз худ намудани ихтисосҳои талаботдоштаи бозори меҳнат ва фароҳам овардани имкониятҳои нави шуғл байни муҳоҷирони бозпасгардида яъне ихроҷшуда низ ироъа гардид.

Ҳамчунин, иштирокчиён ба риояи тарзи ҳаёти солим, беҳдошти шахсӣ ва ҷамъиятӣ, пешгирии бемориҳои сироятӣ ва ҳифзи саломатии худу атрофиён даъват карда шуданд. Таъкид гардид, ки саломатии шаҳрвандон, маърифати санитарӣ ва муносибати масъулиятнок ба муҳити зист аз омилҳои муҳими таъмини зиндагии шоиста ва фаъолияти самараноки меҳнатӣ мебошанд.

Дар рафти вохӯрӣ иштирокчиён доир ба масъалаҳои баррасишуда мубодилаи афкор намуда, оид ба мушкилоти мавҷуда ва роҳҳои ҳалли онҳо андешаҳои худро баён карданд. Чунин вохӯриҳо барои баланд бардоштани сатҳи огоҳии сокинон, таҳкими ҳамкории мақомоти масъул бо аҳолӣ ва пешгирии мушкилоти марбут ба муҳоҷирати меҳнатӣ аҳамияти муҳим доранд.

Дар фарҷоми чорабинӣ гуфта шуд, ки корҳои иттилоотию фаҳмондадиҳӣ дар байни сокинони маҳал минбаъд низ идома ёфта, барои баланд бардоштани маърифати ҳуқуқӣ, рушди касбу ҳунар, мусоидат ба шуғли аҳолӣ, ҳифзи ҳуқуқу манфиатҳои муҳоҷирони меҳнатӣ ва таҳкими некӯаҳволии оилаҳо равона карда мешаванд.

Маркази матбуоти Хадамоти муҳоҷират