Дар асоси нақша – чорабинӣ бахши Хадамоти муҳоҷират бо сокинони Ҷамоати шаҳраки Сирдарёи шаҳри Гулистон вохӯрӣ баргузор карда шуд.
Дар вохӯрии мазкур муовини Раиси шаҳри Гулистон, муовини сардори Шуъбаи дар шаҳри Гулистонбудаи РКДАМ Ҷумҳурии Тоҷикистон дар вилояти Суғд, Раиси КИ ҲХДТ, намояндаи ШВКД дар шаҳри Гулистон, мудирони бахши кор бо ҷавонон ва варзиши шаҳр ва бахши Хадамот муҳоҷират дар шаҳри Гулистон иштирок ва суханронӣ намуданд.
Мувофиқи нақшаи муштараки болозикр маърӯзачиён ҷиҳати пешгирии падидаҳои номатлуб дар ҷомеа, аз қабили пешгирии ифротгароӣ, терроризм, таълимоти ғайрирасмии динӣ, либоси бегона ва тарғиби арзишҳои миллӣ баромад карда, сокинонро ба ҳифз кардани худ ва наздиконашон аз ҳамаи зуҳуроти падидаҳои номатлуб даъват намуданд. Аз ҷумла, шунавандагон бо роҳҳои гаравидани шаҳрвандон, хусусан ҷавонону наврасон ба ҳар гуна ҳаракату гурӯҳҳои экстемистию террористӣ шинос гардиданд ва ҷиҳати пешгирии чунин ҳодисаҳо аз ҷониби масъулин маслиҳатҳои муфид дода шуд. Масъулон қайд намуданд, риояи ҳатмии қонунгузории Ҷумҳурии Тоҷикистон, аз ҷумла Қонунҳои Ҷумҳурии Тоҷикистон “Дар бораи масъулият барои таълиму тарбияи кӯдак”, “Дар бораи танзими ҷашну маросим дар Ҷумҳурии Тоҷикистон”, “Дар бораи тарбияи ватандӯстии шаҳрвандон” замина барои рушди устувори давлат ва таъмини некӯаҳволии ҷомеа мебошад.
Дар навбати худ, мудири бахши Хадамот муҳоҷират дар шаҳри Гулистон дар давоми баромади худ қайд кард, ки пешгирӣ ва муқовимат ба ҳамаи падидаҳои номатлуб, аз ҷумла ҳуқуқвайронкуниву ҷиноятсодиркунӣ, махсусан аз тарафи занон ва ноболиғон вазифа ва қарзи шаҳрвандии ҳар як узви ҷомеа буда, шароити имрӯзаи ҷаҳон тақозо мекунад, ки донишомӯзӣ ва васеъкунии ҷаҳонбинӣ бо мақсади ташаккулёбии фикрронии интиқодӣ бар асоси эҳтиром ба арзишҳои миллӣ бояд кори ҳамарӯзаи на танҳо хонандагону донишҷӯён ва омӯзгорон, балки он дар реҷаи ҳаррӯзаи волидайн низ ҷойгоҳи махсуси худро дошта бошад.
Аз ҷониби мудири бахши Хадамоти муҳоҷират дар шаҳри Гулистон таъкид гардид, ки бо мақсади пешгирӣ гардидани падидаҳои номатлуби зикргардида дар ҷумҳурӣ стратегияву барномаҳои давлатӣ қабул гардида, масъулони дахлдор ҷиҳати амалисозии онҳо ҳамарӯза фаъолият доранд ва дар қатори онҳо Стратегияи давлатии муқовимат ба коррупсия, Стратегияи давлатии пешгирии экстремизм ва терроризм, Барномаи давлатии муқовимат ба ҷинояткорӣ ҷойгоҳи калидӣ доранд. Қайд гардид, ки амалисозии пурраи онҳо танҳо дар ҳолати ҳамкории фаъоли ҷомеа имконпазир аст. Аз ин лиҳоз, сокинон ба фаъолияти якҷоя баҳри таъмини рушди кишвар даъват карда шуданд.
Дар охир байни масъулон ва ҳозирин бобати масъалаҳои матраҳгардида суҳбати озод доир гардид.
Маркази матбуоти Хадамоти муҳоҷират
