Дар доираи ташаббуси ҷумҳуриявии “300 рӯзи ободонӣ ва бунёдкорӣ: баҳри ободии диёр” бахши Хадамоти муҳоҷират дар ноҳияи Қубодиён дар ҳамбастагӣ бо Мақомоти иҷроияи ҳокимияти давлатии ноҳия, Кумитаи иҷроияи Ҳизби Халқии Демократии Тоҷикистон дар ноҳия, бахшҳои кор бо занон, оила, ҷавонон ва варзиш, инчунин Шуъбаи маорифи ноҳия дар деҳаҳои Ҳаваскор, Ахтарсо, ба номи Х. Файзуллоев ва Фароғати Ҷамоати деҳоти Тахти Сангин бо сокинон ва фаъолони маҳаллӣ вохӯриҳо баргузор намуданд.
Зимни вохӯриҳо масъалаҳои ободониву созандагӣ, саҳмгузорӣ дар рушди маҳал, омодагии ҳамаҷониба ба истиқболи ҷашни муқаддаси 35-солагии Истиқлоли давлатии Ҷумҳурии Тоҷикистон, инчунин баланд бардоштани ҳисси ватандӯстӣ ва масъулияти шаҳрвандӣ мавриди баррасӣ қарор гирифтанд.
Дар деҳаи Фароғат меҳнати дастаҷамъонаи сокинон намунаи ибрат буд. Бо роҳи ҳашари умумӣ корҳои ҳамворсозӣ ва рехтани қабати бетонии фарши саҳни ҳавлии Муассисаи таҳсилоти миёнаи умумии №28 бо маром идома дошт. Сокинон ҳамчунин иттилоъ доданд, ки барои бунёд ва ба истифода супоридани як майдончаи муосири варзишӣ омодагиҳои зарурӣ ҷараён доранд, ки он барои рушди тарбияи ҷисмонӣ ва фароғати ҷавонон мусоидат хоҳад кард.
Зикр гардид, ки муҳоҷирони меҳнатии бозгашта низ дар корҳои созандагиву ободонӣ саҳми арзанда мегузоранд. Дастгирии онҳо дар бунёди иншооти иҷтимоӣ, беҳтар намудани шароити маҳал ва рушди деҳаҳо аз ҷониби сокинон бо қадрдонӣ арзёбӣ карда шуд.
Дар ҷараёни вохӯрӣ сокинони деҳаҳо бо барномаҳои фарҳангӣ омодагии ҷиддии худро ба истиқболи 35-солагии Истиқлоли давлатӣ нишон дода, маҳсули заҳмати худ, аз ҷумла корҳои ободонӣ, бунёдкорӣ ва дигар дастовардҳои маҳаллиро муаррифӣ намуданд.
Ҳамчунин, ба хотири арҷгузорӣ ба рамзҳои давлатии Ҷумҳурии Тоҷикистон ва таҳкими ҳисси ифтихори миллӣ, дар болои як қатор манзилҳои истиқоматӣ Парчами давлатии Ҷумҳурии Тоҷикистон насб гардид.
Чунин иқдомҳои созанда бори дигар собит месозанд, ки бо ваҳдату ҳамдилӣ, меҳнати софдилона ва ҳисси баланди масъулиятшиносӣ метавон ҳар гӯшаи диёрро ободу зебо гардонд ва ҷашни бузурги миллӣ — 35-солагии Истиқлоли давлатии Ҷумҳурии Тоҷикистонро бо дастовардҳои шоиста истиқбол гирифт.
Алимардонов Ф., Мудири бахши Хадамоти муҳоҷират дар ноҳияи Қубодиён
