Санаи 4 июни соли 2026, Сардори Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон Нодирзода Иматшо ҷиҳати омӯзиши рафти корҳои омодагӣ ба ҷашни 35-солагии Истиқлоли давлатии Ҷумҳурии Тоҷикистон, инчунин шиносоӣ аз фаъолияти мақомоти маҳаллӣ ва вазъи корҳои ободониву созандагӣ дар Ҷамоати деҳоти Тахти Сангин боздид ба амал овард.
Дар доираи таҷлили 35-умин солгарди Истиқлоли давлатии Ҷумҳурии Тоҷикистон дар саросари кишвар корҳои ободонӣ ва сохтмонӣ идома доранд. Объекти идонаи ҷамоати деҳоти Тахти Сангинро Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон ба ӯҳда дорад.
Вобаста ба иҷрои дастуру супоришҳои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон “Дар бораи самтҳои асосии сиёсати дохилӣ ва хориҷии Ҷумҳурии Тоҷикистон”, аз ҷумла омодагӣ ба таҷлили ҷашни 35-солагии Истиқлоли давлатии Ҷумҳурии Тоҷикистон муайян гардид, ки дар ҳудуди Ҷамоати деҳоти Тахти Сангин корҳои ободониву созандагӣ марҳила ба марҳила амалӣ гардида, дар самти бунёду азнавсозии иншоотҳои иҷтимоӣ, таъмиру тармими роҳҳо, сабзазоркунӣ, баланд бардоштани фарҳанги шаҳрнишинӣ ва беҳтар намудани шароити зиндагии аҳолӣ тадбирҳои муайян амалӣ шуда истодаанд.
Ҳамзамон, дар рафти вохӯрӣ бо сокинони Ҷамоати деҳоти Тахти Сангин Сардори Хадамоти муҳоҷират махсус қайд карданд, ки Пешвои муаззами миллат муҳтарам Эмомалӣ Раҳмон дар мулоқот бо фаъолон, намояндагони ҷомеа ва ходимони дини кишвар, ки 9 марти соли 2024 баргузор шуд, изҳор намуданд, ки “Дар ин давра ба асари ташвиқоти густурдаи экстремистӣ тавассути шабакаҳои иҷтимоӣ ва ҳангоми дар муҳоҷирати меҳнатӣ қарор доштани шаҳрвандон шомилшавии ҷавонон ба ташкилоти экстремистиву террористии “Давлати исломӣ” ва дигар гурӯҳҳои террористӣ, сафарбар гардидани онҳо ба минтақаҳои даргир афзуда, нигаронии ҷиддии ҷомеаро ба миён овард”.
Дар робита ба ин, Хадамоти муҳоҷират бо мақсади вусъат додани корҳои иттилоотию фаҳмондадиҳӣ дар байни муҳоҷирони баргашта, омодасозии пеш аз сафари муҳоҷирони меҳнатӣ, пешгирии онҳо аз шомилшавӣ ба ҳизбу ҳаракатҳои террористию экстремистӣ ва муҳоҷирати ғайриқонунӣ чораҳои зарурӣ меандешад.
Мавриди зикр аст, ки дар асоси дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корҳои бунёдкорию созандагӣ бахшида ба ҷашни 35-солагии Истиқлоли давлатӣ дар тамоми шаҳру ноҳияҳои мамлакат бомаром идома дорад. Густариши корҳои ободонӣ дар ноҳияи Қубодиён низ гувоҳи он аст, ки сокинони меҳнатқарин барои таҷлили шоистаи ҷашни 35-солагии Истиқлоли давлатӣ ҳамаҷониба омодагӣ мебинанд.
Маркази матбуоти Хадамоти муҳоҷират
