Бо шарофати Истиқлоли давлатӣ имрӯзҳо дар гӯшаву канори ноҳияи Темурмалик корҳои созандагиву бунёдкорӣ дар авҷанд. Симои ноҳия рӯз ба рӯз зеботару пурҳашамат мегардад. Роҳҳои мумфарш, кӯчаву гулгаштҳои тозаю озода, корхонаҳои навбунёд, муассисаҳои таълимӣ, марказҳои хизматронӣ ва иншооти хуштарҳу замонавии маъмурию маишӣ дар ноҳия далели ин гуфтаҳоянд. Мардуми заҳматпешаи ноҳия ин ҳамаро аз сиёсати хирадмандона ва иқдомҳои созандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон арзёбӣ намуда, дилгармона ба сӯи фардои дурахшон гом мениҳанд.
Бахшида ба таҷлили сазовори Ҷашин 35 – солагии Истиқлоли давлатӣ дар ҷамоатҳои шаҳраку деҳотҳҳои ноҳия сохтмону азнавсозии иншоотҳо, аз ҷумла дар соҳаҳои маориф, фарҳанг, тандурустӣ, варзиш, инчунин, таҷдиду азнавсозии роҳу маҳаллаҳо на танҳо дар маркази ноҳия балки дар деҳоти атрофи он ҳам бомаром сурат гирифта, дигаргуниҳои зиёд ба вуқуъ пайвастанд. Сокинони сарбаланди ноҳия бо шукргузорӣ аз ваҳдати миллӣ, сулҳу субот, оромию осудагии кишвар бо дили гарм ва руҳияи баланди ватандӯстӣ баҳри рушди соҳаҳои хоҷагии халқ дастаҷаъмона кӯшиш менамоянд.
Аз ҷумла, аз ҷониби шаҳрвандони бурунмарзии ноҳия, ки айни замон берун аз Ватан кору фаъолият доранд, дастаҷамъона ба маблағи 150 ҳазор сомонӣ барои мумфарш намудани роҳи Ҷамоати деҳоти Кушктепа, ки зиёда аз 10 км роҳро ташкил медиҳад, саҳмгузорӣ намуданд. Бояд қайд кард, ки дар ин кори хайр сокинони ҷамоат низ, дар мумфарши роҳ саҳми худро гузоштанд.
Ташаббуси мазкур бори дигар нишон медиҳад, ки новобаста аз дурӣ аз Ватан, ҳамватанони мо ҳамеша дар канори мардуми тоҷик қарор гирифта, рӯҳияи кӯмакрасонӣ ва инсонпарвариро пуштибонӣ менамоянд.
Қобили қайд аст, ки бо мақсади ҷалб ва сафарбар намудани диаспораи тоҷикон, муҳоҷирони меҳнатӣ, ҳамватанон ва тоҷикони бурунмарзӣ, ҳамкорӣ кардан бо онҳо барои таъмини рушди устувори Ҷумҳурии Тоҷикистон тариқи фароҳам овардани заминаҳои мусоид, бунёди эътимод ва таҳияи барномаҳои иҷтимоӣ, қарори Ҳукумати Ҷумҳурии Тоҷикистон аз 29 майи соли 2010, №277 “Оид ба тасдиқи Консепсия дар бораи ҷалби ҳамватанони бурунмарзӣ ҳамчун шарикони рушди кишвар” қабул гардидааст, ки ҷиҳати татбиқи он бо қарори Ҳукумати Ҷумҳурии Тоҷикистон аз 1 июни соли 2021, №213 Нақшаи чорабиниҳо оид ба амалигардонии Консепсия дар бораи ҷалби ҳамватанони бурунмарзӣ ҳамчун шарикони рушди кишвар барои солҳои 2021-2025 тасдиқ ва мавриди амал қарор дорад.
Мақсади асосии Консепсия ҷалб ва сафарбар намудани диаспораҳои тоҷикон, муҳоҷирони меҳнатӣ, ҳамватанон ва тоҷикони бурунмарзӣ ва инчунин ҳамкорӣ кардан бо онҳо барои таъмини рушди устувори Ҷумҳурии Тоҷикистон тариқи фароҳам овардани заминаҳои мусоид, бунёди эътимод ва таҳияи барномаҳои иҷтимоӣ мебошад.
Маркази матбуоти Хадамоти муҳоҷират
